व्यवस्थापिका–संसद्को आजको बैठकमा प्रमुख प्रतिपक्षी दल नेकपा (एमाले) संसदीय दलका उपनेता सुवासचन्द्र नेम्बाङले सरकारले स्थानीय तह निर्वाचनको मिति घोषणा गरिएकोमा सिङ्गो मुलुक त्यसलाई सफल तुल्याउनेतर्फ लाग्नुपर्नेमा जोड दिएका छन्।
निर्वाचनमा मुलुक होमिनुपर्ने समयमा संविधान संशोधनको विषय औचित्यहीन भएको बताउँदै उनले संविधान कार्यान्वयन अहिलेको प्रमुख आवश्यकता रहेको बताए।
नेता नेम्बाङले संविधान संशोधन विधेयक सदनमा उपस्थित नौ दललाई मान्य नहुने दोहोर्याउँदै प्रस्तुत विधेयक संविधान विपरीत भएको दाबी गरे।
‘संविधान संशोधन विधेयक प्रदेशको सीमाङ्कन हेरफेर गर्ने प्रस्ताव संविधानको मर्म र भावना विपरीत, सर्वोच्च अदालतको आदेश विपरीत तथा मधेस र त्यहाँका जनताको हित विपरीत भएकाले हामी त्यसलाई समर्थन गर्दैनौँ,’ उनले भने।
निर्वाचनसम्बन्धी धेरै काम गर्न बाँकी रहेको वर्तमान अवस्थामा तीनै तहको निर्वाचन सम्पन्न गर्नेसम्बन्धी सम्पूर्ण कानुन बनाउनुपर्नेमा सदन त्यसतर्फ नलागी संविधान संशोधनतर्फ लागेको गुणासो गरे।
सरकार र दलहरु चुनावमा केन्द्रीत हुनु पर्ने बेला संशोधन प्रस्ताव अघि बढाउँदा संसद र जनता विभाजित हुने भन्दै ध्यानाकर्षण गराए ।
उनले संशोधन प्रस्ताव पास हुन नदिने आफूहरुको अविचलित अडान रहेको बताए।
सत्ता पक्षले नै संशोधन पास नभए मान्दैनौं भनेको उल्लेख गर्दै उनले त्यसपछि के हुन्छ भनेर सरकारले संसद र आफूहरुलाई आवस्त बनाउन नसकेको बताए।
उनले भने, आजका लागि हामी अवरोध गर्दैनौं । मौन बस्छौं । छलफलमा भाग लिन्नौं।’
मोर्चासँग सम्बन्ध बिग्रिएको छैन
बजारमा मोर्चासँग एमालेको सम्बन्ध बिग्रिएको भन्ने छ। तर, हाम्रो सम्बन्ध राम्रो छ। एमालेलाई बाजा बजाएर लखेट्ने भनिएको छ। हाम्रा उपाध्यक्ष बामदेब गौतमलाई आक्रमणको प्रयास भयो तर पनि हाम्रो सम्बन्ध हार्दिक छ,’ उनले भने,‘ उहाँहरू सत्तामा भएर पनि हामीसँगै प्रतिपक्षमा आउनु भएको छ।’