संविधान संसोधन प्रस्ताव कार्यसुचीमा राख्ने नराख्ने भन्नेमा दलहरुबीच सहमति जुट्न नसकेपछि बुधबार पनि व्यवस्थापिका संसद बैठक विहिबार अपरान्ह ३ बजे सम्मका लागि स्थगित गरिएको हो।
प्रमुख प्रतिपक्षी नेकपा एमाले सहितका ९ विपक्षी दलले संविधान संसोधन प्रस्ताव ल्याए संसद चल्न नदिने र मधेसी दलले संविधान संसोधन प्रस्ताव राख्नुपर्ने अडान लिएपछि कार्यसूची नै तय हुन नसक्दा बैठक सूचना टासेर स्थगित गरिएको हो।
मंगलबार १ बजेका लागि बोलाइएको बैठक बुधबार अपरान्ह २ बजे सम्मका लागि सूचना टाँसेर स्थगित गरिएको थियो। संविधान संशोधन प्रस्ताव सहमतिमै अघि बढाउन दलीय छलफलको आवश्यक्ता देखिएकाले बैठक स्थगित गरिएको थियो। तर, बुधबार पनि दलहरुबीच सहमति जुट्न नसकेपछि बैठक प्रभावित बनेको हो।
आज केही बेर अघि बसेको नौ दलको बैठकले बुधबारको संसद बैठकमा संशोधन विधेयक कार्यसूचीमा नराख्न आग्रह गरेको थियो।
भोलिसम्म सहमतिका लागि प्रयास गरिने बताएपछि संसद सचिवालयले आजको बैठक सूचना टाँसेर स्थगित गरेको हो।
एमाले सांसद भीम रावलले अझै केही समय गृहकार्यका लागि समय मागिएको भन्दै सरकारको धारणा स्पष्ट नआएसम्म पेश नगर्न भनेको बताए।
‘संविधान संशोधन विधेयक प्रस्तुत गरिसकेपछि यदि उक्त विधेयक पास भएपछि सरकारले के गर्छ। होइन फेलनै भयो भने मोर्चाले नस्वीकार्ने निश्चित छ। यस्तो अवस्थामा सरकारले के गर्छ भनेका छौ,’ उनले भने,‘ सरकारको यसबारे धारणा नआएसम्म संसदमा विधेयक कार्यसूचीमा नराख्न आग्रह गरेका छौ।’
संघीय समाजवादी फोरमका नेता अशोक राइले सरकारले परिमार्जनसहितको संशोधन ल्याए परिणाममा हामीलाई कुनै आशा नभएको बताए।
