संघीय समाजवादी फोरमका नेता शिवजी यादवले नयाँ संविधान जारी भएपछि हार्दिकतापूर्वक स्वागत गरेकोमा चीनलाई धन्यवाद दिएका छन्।
अहिलेसम्म संविधान स्वीकार नगरेको फोरमका नेता यादवले संविधानको स्वागत गरेकोमा चीनलाई धन्यवाद दिएका हुन्।
'नयाँ संविधानमा हाम्रो असन्तुष्टी छ। हामीलाई स्वीकार छैन,' सिन्ह्वा समाचार एजेन्सीले आयोजना गरेको नेपाल-चीन बुद्धिजीवी सम्मेलनमा बोल्दै उनले भने, 'तर यो हाम्रो आन्तरिक मामिला हो। यो समस्या हामी आफैं हल गर्न सक्छौं। चीनले यो नेपालको आन्तरिक समस्या हो भन्दै संविधान स्वागत गर्यो, जसकालागि चीन धन्यवादको पात्र बनेको छ।'
उनले नेपालमा जतिसुकै राजनीतिक व्यवस्था परिवर्तन भए पनि चीनसँग सम्बन्धमा कहिल्यै उतारचढाव नआएको बताए।
यो सम्बन्धलाई भविष्यमा पनि यस्तै सन्तुलित ढंगमा अघि बढाउनु पर्ने उनको भनाई छ।
एमाले अध्यक्ष केपी ओली नेतृत्वको सरकारले चीनसँग गरेका सम्झौता नेपालको हितमा भएको टिप्पणी गर्दै उनले ती सम्झौता कार्यान्वयन हुनुपर्ने बताए।