प्रधानमन्त्री पुष्पकमल दाहालले माघ १५ भित्र स्थानीय तहको निर्वाचनको मिति घोषणा हुने बताएका छन्।
प्रधानमन्त्री दाहालले निर्वाचन आयोगसँग परामर्श गरी निर्वाचनको मिति घोषणा गर्न आफू प्रतिवद्ध रहेको पनि उल्लेख गरे। संयुक्त अरव इमिरेट्समा आयोजित विश्व उर्जा सम्मेलनमा भाग लिई स्वदेश फर्किएका प्रधानमन्त्री दाहालले त्रिभुवन अन्तर्राष्ट्रिय विमानस्थलमा संचारकर्मीमाझ कुरा गर्दै निर्वाचनका लागि आवश्यक राजनीतिक सहमति जुटाउन आफू लागिपरेको दाबी गरे।
उनले निर्वाचनको तयारीकै लागि निर्वाचन सम्बन्धि विधेयक संसदमा पेश गरेको उल्लेख गर्दै छिट्टै पारित हुने विश्वास पनि व्यक्त गरे। प्रधानमन्त्री दाहालले आफू संयुक्त अरब इमिरेट्समा गएको विषयमा नकारात्मक टिका टिप्पणी गरिएको भन्दै असन्तुष्टि पनि व्यक्त गरे। निर्वाचनको तयारीमा जुट्ने बेला प्रधानमन्त्री विदेश भ्रमणमा निस्किएको समाचार सम्प्रेषण भएकोतर्फ संकेत गर्दै प्रधानमन्त्री दाहालले आफूप्रति नकारात्मक नभईदिन संचारकर्मीलाई आग्रह गरे।
प्रधानमन्त्री दाहालले आफ्नो संयुक्त बरव इमिरेटसको भ्रमण सफल भएको दाबी पनि गरेका छन्। उनले दुई देशबीचको सम्बन्ध सुदृढ बनाउन आफ्नो भ्रमण सफल भएको बताएका हुन्। प्रधानमन्त्री दाहालले नेपालको उर्जा क्षेत्रमा लगानी गर्न सम्मेलनमा सहभागी सबै राष्ट्रले प्रतिवद्धता जनाएको पनि उल्लेख गरे।
प्रधानमन्त्री दाहालले संयुक्त अरब इमिरेटसको बसाईमा त्यहाँका समकक्षी शेख मोहम्मद विन रसिद अल माक्तुमसँग भेट गरी नेपाली कामदारको समस्या समाधानका लागि विशेष चासो दिन आग्रह गरिएको पनि बताए।
उनले मृत्युदण्डको सजाय पाई दुवईको केन्द्रीय कारगारमा बन्दी रहेको नेपाली नागरिक अमरबहादुर बमलाई रिहा गरिदिन पनि त्यहाँको सरकारसँग आग्रह गरिएको जानकारी दिए।
प्रधानमन्त्री दाहाल संयुक्त अरव ईमिरेटसका युवराज शेख महम्मद विन जायद अल नाह्ययनको मैत्रीपूर्ण नियन्त्रणामा माघ १ गते त्यसतर्फ प्रस्थान गरेका थिए।
