२०६२/६३ को ऐतिहासिक जनआन्दोलनका नागरिक अगुवा शम्भु थापाले अख्तियार दुरुपयोगको अनुसन्धान रोकी भ्रष्टाचारलाई वैधानिकता दिन चार पार्टी र खिलराज रेग्मीले लोकमानसिंह कार्कीलाई प्रमुख आयुक्तमा नियुक्त गर्न लागेको आरोप लगाएका छन्।
लोकमानको सिफारिस रोक्न परेको रिटमा 'अख्तियारमा उच्च नैतिकता आवश्यक भएकोबारे आफूलाई जानकारी भएको' जवाफ सर्वोच्चलाई दिएर तिनैलाई रोज्ने रेग्मी नै नैतिकहीन भएको थापाले बताए।
सबैभन्दा शक्तिशाली संवैधानिक निकाय अख्तियारमा विवादस्पद् छविका कार्कीको नियुक्ति रोक्न राष्ट्रपति कार्यालयअगाडि धर्ना दिइरहेका आम नागरिकलाई सम्वोधन गर्दै थापाले भने, 'यस्ता नैतिकता नभएका खिलराजलाई कुर्सीबाट खसाल्छौं खसाल्छौं।'
'नेपाली जनतालाई संविधान दिन नसक्ने, कुनै पनि विषयमा एक ठाउँ उभिन्न नसक्ने चार दल लोकमानलाई ल्याउन कसरि एकै ठाउँ उभिए,' उनले भने, 'विदेशी शक्ति र पैसाको खेलले सहमत गराएको हो।'
अपरान्ह चार बजेदेखि एक घन्टा भएको धर्ना कार्यक्रममा विभिन्न पेसाकर्मी, युवा र विद्यार्थी उपस्थित थिए । हज्जारौं शहिदको रगतलाई बिर्सेर लोकमानलाई सिफारिस गर्ने चार दलका नेताहरुसँग जवाफ माग्ने कार्यक्रम नागरिक अगुवाहरुले तय गरेका छन्।
थापाले धर्नामा गराएको जानकारी अनुसार भोलि (मंगलबार) एकीकृत माओवादी कार्यालय पेरिसडाँडामा धर्ना गरेर त्यसको जवाफ मागिनेछ। 'प्रचण्डले नेपाली जनतालाई संविधान दिन खोजेको हो लोकमान,' उनले भने।
माओवादी अध्यक्षलाई लोकमानलाई पेरिसडाँडा बोलाएर आफ्ना शहिदहरुको मार्ल्यापण गराउन पनि उनले चुनौती दिएका छन्।
नागरिक आन्दोलनकर्मीहरुले माओवादीबाट सुरु गरी प्रत्येक दिन एउटा प्रमुख पार्टीसँग निर्विकल्प लोकमानको योग्यताबारे जवाफ माग्ने भएका छन्।
सतहमा लोकमानको प्रकरणको विरोध गर्ने तर उच्चस्तरीय राजनीतिक संयन्त्रदेखि संवैधानिक परिषद् जस्ता आाधिकारिक निकायमा मौन रहेको एमाले र कांग्रेसलाई पनि नागरिक अगुवाहरुले नछाड्ने भएका छन्।
'नेकपा (एमाले)का अध्यक्ष झलनाथ खनाललाई पनि हामी सोध्छौं,' थापाले भने, 'उनी साँच्चिकै झलनाथ हुन् की झल्लु त्यसपछि थाहा हुन्छ।'
'संविधान देऊ भन्दा दिएनन्। खिलराजलाई नलेऊ भन्यौं ल्याए। दुई पद नदेऊ भन्यौं दिए। लोकमानलाई नलेऊ भन्यौं ल्याए,' थापाले भने, 'दलहरु हाम्रा कुरा सुन्दैनन्, सधै प्रेसर आयो भनेर लाचार हुन्छन्।'
चार दल र सरकारले गरेको निर्णयविरुद्व न्याय खोज्न नागरिकहरु एकजुट हुनुपरेको धारणा धर्नालाई संबोधन गरेका अरु पेसाकर्मीहरुले व्यक्त गरेका थिए।
