कवि भूपी शेरचनले उहिल्यै भनेका थिए, ‘यो हल्लै हल्लाको देश हो ।’ बिहीबार पोखरामा पनि एउटा त्यस्तै हल्ला चल्यो, ‘नयाँ शक्ति नेपालका संयोजक तथा पूर्व प्रधानमन्त्री बाबुराम भट्टराईमाथि जुत्ता प्रहार भयो ।’ भएको के रहेछ भने उनी पृथ्वीनारायण क्याम्पसमा आफ्नो पार्टी समर्थक विद्यार्थीको कार्यक्रमलाई सम्बोधन गर्दै थिए, एक विद्यार्थीले कालो झण्डा देखाए । त्यो घटना यसरी फैलियो कि भट्टराई माथि जुत्तै हानियो ।
बिहीबार बिहान ८ बजेतिर कार्यक्रम सुरु भयो । त्यसपछि १०:२५ होला भट्टराईबाहेक सबै वक्ताले बोलेर सके । त्यहाँ उपस्थित विद्यार्थीले बाबुरामकै बोली कुरिरहेका थिए । तीमध्येका एक विद्यार्थी थिए, क्याम्पसको स्नातकोत्तर पहिलो वर्ष राजनीतिशास्त्र र दोस्रो वर्ष अर्थशास्त्रमा अध्ययनरत सञ्जीव भट्टराई । तर उनको उद्देश्य भनेको डा. भट्टराईको भाषण सुन्ने थिएन, विरोध गर्ने थियो ।
नीलो—नीलो र हरियो ज्याकेट लगाएर सञ्जीव मञ्चबाट सय मिटर जति पर बसिरहेका थिए । जसै बाबुरामले भाषण गर्न थालेको २ मिनेट भएको थियो, सञ्जीव आफ्नो ठाउँबाट उठे अनि भिरिरहेको झोलाभित्रबाट कालो भण्डा र हातमा पर्चा देखाए । उनको झण्डा देखेर त्यहाँ खलबल मच्च्यिो । साधा पोसाकका ४/५ जना प्रहरी त्यो देख्नेबित्तिकै सञ्जीवतिर हानिए । उनलाई समातिहाले । ‘मैले विरोध गर्न नपाउने <’ भन्दै सञ्जीव उम्कन खोजे तर प्रहरीले नियन्त्रणबाट दायाँबायाँ हुन दिएन ।
डा.भट्टराईले ‘विरोध गर्न पाइन्छ’ भन्दै भाषणलाई जारी राखे । यता सञ्जीवले आफ्नो नेतालाई कालो झण्डा देखाएको आक्रोशमा नयाँ शक्तिका विद्यार्थी उफ्रिन थाले । सोही हुलमुलमा परेका सञ्जीवको जुत्ता फुस्कियो । त्यति भएपछि ‘नेतालाई जुत्ता हान्यो रे’ भन्दै त्यही हल्लाखल्ला मच्चियो । नयाँ शक्ति इतरका केही विद्यार्थीले पत्रकारहरुलाई भट्टराईमाथि जुत्ता हानिएको सूचना टिपाइदिए । पत्रकारहरुलाई मसला पुगिहाल्यो, अनि तुरुन्तै ब्रेकिङ, न्युज दिन थाले, भट्टराईमाथि जुत्ता प्रहार । हल्ला यति छिटो मच्चियो कि प्रहरीले क्याम्पसको मुल गेटबाट सञ्जीवलाई लिएर निक्लन सक्ने स्थिति भएन । त्यसपछि प्रहरीले माथिल्लो गेट हुँदै सञ्जीवलाई वडा प्रहरी कार्यालय बगर पुर्यायो ।
कालो झण्डा देखाएर विरोध गरेकै कारण सञ्जीवलाई नियन्त्रणमा लिएको वडा प्रहरी कार्यालय बगरका प्रमुख इन्स्पेक्टर किशोर लम्सालले बताए । लम्सालले सञ्जीवबाट जुत्ता प्रहार नभएको तर विरोध स्वरुप कालो झण्डा र पर्चा देखाएको जानकारी दिए । पर्चामा ‘बाबुराम भट्टराईको नैतिक पतनमा विद्यावारिधि’ भनेर लेखिएको थियो । ‘यो मेरो पहिलो विरोध हो,’ सञ्जीवले सेतोपाटीसँग भने, ‘भट्टराईलाई मात्र होइन अन्य नेतालाई पनि विरोध गर्न पछि पर्दिनँ ।’
राजनीतिक दलका नेतामाथि वितृष्णा भएका कारणले विरोध गरेको उनले सुनाए । ‘यिनै नेताले हो देश बिगारेको,’ उनले सेतोपाटीसँग भने, ‘मैले गल्ती गरेको होइन ।’ सञ्जीवको पोखरा–११ पूmलबारीमा मासु पसल छ । कैलाली घर भई हाल पोखरा पूmलबारी बस्ने २९ वर्षीय सञ्जीवलाई बगर प्रहरीले बिहीबार साँझ छाडिदिएको छ । उनीविरुद्ध डा. भट्टराई पक्षबाट कुनै उजुरी नपरेपछि बगर प्रहरीले पृथ्वीनारायण क्याम्पस नयाँ शक्तिका विद्यार्थी नेताको रोहबरमा सञ्जीवलाई साथीको जिम्मा लगाएको छ ।
काठमाडौं फर्कनुअघि पोखरा विमानस्थलमा बिहीबारै पत्रकारहरुसँग कुरा गर्दै डा. बाबुराम भट्टराईले आफूमाथि जुत्ता प्रहार नभएको तर कालो झण्डा भने देखाइएको बताए । ‘मैले जुत्ता हानेको देखिनँ । कालो झण्डा देखाउनुभएको थियो । विरोध गर्न पाइन्छ भनेको थिएँ,’ उनले भने, ‘उहाँका जस्तो धेरै नेपालीका असन्तुष्टि छन् । लोकतन्त्रमा असन्तुष्टि पोख्न पाइन्छ । मैले यसलाई सामान्य रुपमा लिएको छु ।’
