सर्वोच्च अदालतले राष्ट्र बैंकका सञ्चालक बालकृष्णमान सिंहको योग्यतामाथि प्रश्न उठाउँदै काम नगर्न अन्तरिम आदेश दिएको छ।
प्रधानन्यायाधीश सुशीला कार्की र न्यायाधीश प्रकाश राउतको इजलासले मंगलबार 'रिटको टुंगो नलागेसम्म काम गर्न-गराउन रोक्नू' भनी अन्तरिम आदेश दिएको हो।
सरकारले चार वर्षअघि सिंहलाई राष्ट्र बैंक सञ्चालक नियुक्त गरेको थियो। अधिवक्ता शम्भु दुवाडीले सिंहको योग्यतामाथि प्रश्न उठाउँदै मंसिर २ गते रिट दायर गरेका थिए। राष्ट्र बैंक ऐन २०५८ अनुसार सञ्चालक बन्न सिंहको योग्यता पुग्ने नदेखिएको भन्दै सर्वोच्चले उक्त आदेश जारी गरेको हो।
ऐनअनुसार सञ्चालक बन्न आर्थिक, मौद्रिक, बैंकिङ, वित्तीय, वाणिज्य, जनप्रशासन, तथ्यांकशास्त्र, गणित वा कानुन विषयमा स्नातकोत्तर उपाधि प्राप्त गरी मौद्रिक, बैंकिङ, वित्तीय वा वाणिज्य कानुनको क्षेत्रमा अनुभव हासिल गरेको हुनुपर्छ। सिंहसँग यही शैक्षिक योग्यता नभएको रिटमा उल्लेख थियो।
उनले भारतबाट चार्टड अकाउन्टेन्ट गरेका थिए। उनको शैक्षिक प्रमाणपत्रलाई त्रिभुवन विश्वविद्यालयले स्नातकोत्तर सरह मानेको छैन। सर्वोच्चले गरेको यो निर्णयले स्नातकोत्तरको शैक्षिक योग्यता चाहिने ठाउँमा चार्टड अकाउन्टेन्टको प्रमाणपत्र पेस गरेका अन्य नियुक्ति पनि प्रभावित हुने देखिन्छ।
