सत्तारुढ नेपाली काँग्रेसका युवा नेता चन्द्र भण्डारीले पाँच नम्बर प्रदेशको सीमा हेरफेर गर्नैपर्ने आधार पेश गर्न प्रधानमन्त्री पुष्पकमल दाहाललाई चुनौती दिएका छन्।
नेता भण्डारीले संविधानमा आयोगमार्फत प्रदेशहरुको सीमांकन हेरफेर गर्ने स्पष्ट व्यवस्था गर्दागर्दै सरकारले पाँच नम्बर प्रदेशमा विभाजन ल्याउन खोज्नुको नियत रहस्यमय भएको पनि स्पष्ट पारे।
गुल्मी क्षेत्र नम्बर २ का सांसद समेत रहेका उनले मुलुकलाई लैनचौरबाट चलाउन खोजिएको भन्दै त्यसो हुन नदिने अडान पनि राखेका थिए।
राजधानीमा आयोजित साक्षात्कार कार्यक्रममा बोल्दै नेता भण्डारीले संविधान संशोधन प्रस्ताव पहाड र तराई मिल्न दिनुहुन्न भन्ने आशयका साथ आएकाले त्यसलाई साथ दिन नसकिने पनि दोहोर्याए।
प्रमुख प्रतिपक्ष नेकपा एमालेका सचिव गोकर्ण विष्टले सरकारले संविधानको उलंघन गर्दै संशोधन प्रस्ताव दर्ता गराएकाले यसलाई संसदमा छलफलमा लैजान नदिएको स्पष्ट पारे। प्रादेशिक सभाको गठन नभई प्रदेशको सीमांकन बदल्न नमिल्ने संवैधानिक व्यवस्था विरुद्ध संविधान संशोधन प्रस्ताव आएकाले त्यसको विरुद्ध सदन अवरुद्ध गर्नु परेको पनि स्पष्ट पारे।
सचिव विष्टले मुलुकको स्वाधिनत र स्वतन्त्रताको रक्षाका लागि पनि संविधान संशोधन प्रस्ताव विरुद्ध लडनु परेको दावी गरे।
पाँच नम्बर प्रदेशमा रहेका सत्तारुढ दलकै नेताहरुले पनि सरकारले ल्याएको संविधान संशोधन प्रस्ताव विरुद्ध सडक संघर्ष गर्दै आएका छन्। उनीहरुले संविधान संशोधन प्रस्ताव संसदबाट पास हुनै नसक्ने ठोकुवा पनि गरेका छन्।