माइतीघरमा सयौंको नारा, ‘माफियाको अर्को नाम, तीर्थ खनिया-धनिराम’

नारायण महर्जन

त्रिवि शिक्षण अस्पतालमा २१ दिनदेखि अनसनरत वरिष्ठ चिकित्सक गोविन्द केसीको जीवनरक्षाको माग गर्दै राजधानीमा विशाल प्रदर्शन गरिएको छ। सोलिडारिटी फर गोविन्द केसी अलाइन्सको अगुवाईमा माइतीघरबाट नयाँ बानेश्वरसम्म प्रदर्शन भएको हो।

र्‍यालीमा सहभागीले शिक्षामन्त्री धनिराम पौडेलको राजीनामा मागेका थिए। र्‍यालीमा नयाँ शक्ति पार्टी नेपालका संयोजक एवम पूर्वप्रधानमन्त्री बाबुराम भट्टराईसहित राजनीतिक दलका प्रतिनिधि, नागरिक अभियन्ता, चिकित्सक, विभिन्न पेशा व्यवसायीहरू सहभागी थिए।

चिकित्सा क्षेत्रको सुधार र चिकित्सा शिक्षालाई सर्वसाधारणको पहुँचमा पुर्‍याउनुपर्ने माग गर्दै चिकित्सक केसी पटक-पटक अनसन बस्दै आएका छन्। केसीको माग सम्बोधन नभएको भन्दै र्‍यालीमा सहभागीले सरकार माफियाद्धारा सरकार चलेको आरोप लगाए।

सहभागीले ‘माफियाको अर्को नाम, तीर्थ खनिया-धनिराम’, ‘माफियाको मिसन, सिटामोलमा कमिसन’, ‘एक-दुई-तीन-चार, बन्द गर भ्रष्टाचार’ लगायत नारा लगाए। सहभागीले त्रिवि उपकुलपति तीर्थ खनियालाई बर्खास्त गर्न माग गरे।

प्रकाशित मिति: 2016-12-03 14:14:44

प्रतिक्रिया दिनुहोस्