दैलेखको टामुडा गाविस–२ स्थित हाराकोट मतदान केन्द्रबाट बैद्य माओवादीका कार्यकर्ताले मतपत्र र मतपेटिका लुटेपछि मतदान केही बेरका लागि स्थगित भएकामा अहिले सुचारु भएको छ। प्रहरी प्रवक्ता एसएसपी गणेश केसीका अनुसार सर्वदलीय बैठकपछि सहमति गरी मतदान सुचारु भएको हो।
यसअघि प्रहरीले हवाईफायर गरेपछि भएको भागदौडमा परी १२ जना घाइते भएका छन् । माओवादीले गाउँगाउँमा मतदाताहरुलाई मतदान गर्न जानबाट रोक लगाएको छ ।
दैलेखको निर्वाचन क्षेत्र २ को हाराकोट मतदानकेन्द्रबाट बैद्य माओवादीका कार्यकर्ता बिनी शाहीको नेतृत्वमा आएको समूहले करिब ६०० मतपत्र र दुईवटा मतपेटिका समेत लुटेर लगेका छन् ।
त्यसक्रममा प्रहरीले करिब १६ राउण्ड हवाइफायर गरेको छ ।
प्रहरीले हवाई फायर गरेपछि भएको भागदौडमा १२ जना मतदाता घाइते भएका छन् । अहिले नेपाली सेनाका कर्णेल उत्तम बोगटी टोलीले हेलिकप्टरबाट मतपेटिका र मतपत्र उक्त मतदान केन्द्रमा पुर्याएको छ भने घाइतेहरुलाई हेलिकप्टरबाटै सदरमुकाम ल्याइएको छ ।
अब १ घण्टापछि मतदान पुनः सुचारु गरिने प्रमुख जिल्ला अधिकारी होमनाथ थपलियाले बताएका छन् ।
यसैबीच नेकपा–माओवादीका कार्यकर्ताहरुले गाउँ गाउँबाट मतदान गर्न आउन लागेका मतदाताहरुलाई जबर्जस्ती रोकी राखेको र त्यसक्रममा केही स्थानमा झडप समेत भएको बुझिएको छ ।
