अहिले काठमाडौं महानगरपालिका नेपालको एक्लो महानगरपालिका हो। तर, स्थानीय तह पुनर्संरचना आयोगमा अहिलेसम्म आएको प्रस्तावलाई आधार मान्ने हो भने नेपालमा अब तीनवटा महानगरपालिका हुने छ।
आयोगमा अहिलेसम्म प्राप्त प्रस्तावअनुसार विराटनगर र पोखरालाई महानगरपालिका बनाउने प्रस्ताव आएको स्थानीय तह पुनसंरचना आयोगका उपसचिव देवी सुवेदीले जानकारी दिए। अहिलेको काठमाडौं महानगरपालिका भने यथावत रहनेछ।
वर्तमान विराटनगर उपमहानगरपालिकामा वैजनाथपुर र कटहरी गाविस थपेर विराटनगर महानगरपालिका बनाउने प्रस्ताव आयोगले प्राप्त गरेको छ। पोखरालाई महानगरपालिका बनाउन भने कास्कीले तीनवटा प्रस्ताव आयोगमा पठाएको छ।
पहिलो विकल्प पोखरा उपमहानगरपालिका, चापाकोट, कास्कीकोट, मौजा र भदौरे तामागी गाविस मिलाएर पोखरा महानगरपालिका बनाउने गरी प्रस्ताव गरिएको छ। दोस्रो विकल्पमा पोखरा उपमहानगरपालिका, लेखनाथ नगरपालिका मिलाएर पोखरा-लेखनाथ महानगरपालिका बनाउने प्रस्ताव छ। यसमा चापाकोट, कास्कीकोट, मौजा, माझठाना र पुरनचौर गाविस, भदौरे-तामागी गाविसका केही वडा र कालिका गाविसका केही वडा पनि समावेश हुनेछन्।
पोखरा उपमहानगरपालिका र लेखनाथको साथमा पुरनचौर गाविस तथा मौजा र कालिका गाविसका केही वडा समावेश गरी पोखरा-लेखनथा महानगरपालिका बनाउने प्रस्ताव गरिएको छ।
यी प्रस्तावलाई मापदण्डका आधारमा मूल्यांकन गरी आयोगले निर्णय लिने छ। आयोगको मापदण्डअनुसार महानगरपालिका बन्न न्यूनतम ३ लाख जनसंख्या र ४० करोड वार्षिक आय हुनुपर्ने लगायतका सर्त छन्।
अब बन्ने महानगरपालिकाले न्यूनतम २८ देखि ३५ वटासम्म वडा विभाजन गरी सेवा प्रवाह गर्न सक्ने आयोगको मापदण्ड छ।
