नेपाली कांग्रेसका केन्द्रीय सदस्य डा. रामशरण महतले निलम्बित अख्तियार प्रमुख लोकमानसिंह कार्कीविरुद्धको महाअभियोगमा न्यायाधीश बन्न नसक्ने बताएका छन्। तर, उनले महाअभियोगको पक्षमा काँग्रेस उभिने संकेत गरेका छन्।
नेपाल प्रेस युनियन दाङले बिहीबार घोराहीमा गरेको पत्रकार भेटघाट कार्यक्रममा उनले लोकमानको विषयमा छानबिन प्रक्रियालाई प्रभावित पार्ने गरी कांग्रेसले कुनै निर्णय नगर्ने स्पष्ट पारेका थिए। लोकमानको विषयलाई छानबिन गर्न समिति गठन भइसकेको अवस्थामा कांग्रेस न्यायाधीस बन्न नसक्ने उनले बताए।
कांग्रेस संसदको सबैभन्दा ठूलो पार्टी भएकाले बोल्नु पर्ने अवस्था आएपछि सत्यताको पक्षमा निर्णय गर्ने समेत उनले स्पष्ट पारे । उनले भने, ‘कार्कीका बिषयमा छानबिन प्रकृया सुरु भएको छ, समितिको छानबिन प्रतिवेदन पश्चात् मात्रै कांग्रेसले निर्णय गर्नेछ।’ तर, उनले त्यसपूर्व नै काँग्रेस न्यायाधीश बन्न नसक्ने स्पष्ट पारे।
फरक प्रसंगमा नेता महतले सहमतिका आधारमा मात्रै संविधान संशोधन सम्भव हुने बताए। आन्दोलनरत पक्षका माग संबोधन गर्न संविधान संशोधन अनिवार्य रहेको उनको भनाई छ।
