प्रधानमन्त्री पुष्पकमल दाहालले उनको सरकारी निवास बालुवाटारमा बुधबार साँझ सम्पादकहरूसँग छलफल गर्दै आफू मुलुकको हितका लागि कहिले भारततिर कहिले चीनतिर ढल्किने गरेको बताएका छन्।
‘म कहिले भारततिर कहिले चीनतिर ढल्किन्छु। तर, त्यो मेरो व्यक्तिगत स्वार्थका लागि होइन, मुलुकको हितका लागि त्यसो गर्नेगर्छु।’
मुलुकमा राजनीतिक स्थायित्व र आर्थिक समृद्धि भएपछि मात्र देशले सन्तुलित परराष्ट्र सम्बन्ध राख्न सक्ने पछिल्लो एक दशकको आफ्नो निष्कर्ष रहेको भन्दै प्रधानमन्त्रीले भने, ‘त्रिदेशीय साझेदारीले नेपालको समृद्धि र परराष्ट्र सम्बन्धमा समेत सन्तुलन ल्याउने बताए।
उनले यो चैतमा स्थानीय निर्वाचन गर्नुपर्ने र आफू त्यसैका लागि अग्रसर रहेको बताए।
‘आगामी चैतमा पहिले स्थानीय निर्वाचन गर्नुपर्छ। त्यसपछि सम्भव भए केन्द्रीय र संघीय प्रादेशिक निर्वाचन एकै पटक गर्नुपर्छ भन्ने मेरो मान्यता छ,’ प्रधानमन्त्रीले भने, ‘यो भन्दा अन्यथा तिर सोच्नुहुन्न त्यसले गडबढ गर्छ।’
पार्टीहरूबीच समझदारी जुटाएर निर्वाचनमा जानका लागि संविधान स्शोधन आवश्यक रहेको पनि प्रधानमन्त्रीले बताए।
‘मधेसलाई पनि सहमतिमा ल्याएर कुनै न कुनै रूपमा संविधान संशोधन गर्नु आवश्यक छ। त्यसका लागि गृहकार्य भइरहेको छ।’
संविधान संशोधननमा सीमांकन सबैभन्दा जटिल विषय रहेको उल्लेख गर्दै उनले भने, ‘झापा, मोरङ, सुनसरी, कैलाली र कञ्चनपुरमा चलाउन सकिदैन तर, कांग्रेस र एमालेले पहिले प्रस्ताव गरेको सात प्रदेशको वरिपरी सहमति बन्न सक्छ।’
प्रधानमन्त्रीले महाभियोगको विषयलाई टुंगोमा पुर्याउने विषयमा तीन प्रमुख दलको शीर्ष नेताको स्प्रिरिट मिलेको पनि दाबी गरे। आजै साझ बालुवाटारमा बसेको तीन प्रमुख दलका शीर्ष नेता (दाहाल, ओली र देउवा) हरूको बैठकबाट उत्साहित बनेका प्रधानमन्त्रीले भने, ‘हामीतीन नेताबीच धेरै सकारात्मक कुराहरू भएको छ- संविधान संशोधन गर्ने, निर्वाचन गराउने महाभियोगको विषयलाई टुंग्याउने लगायतका विषयमा विस्तृत र सकारात्मक छलफल गरेका छौ।’
सुन्नुहोस् अडियोमा