प्रधानमन्त्री पुष्पकमल दाहालले अख्तियार दुरूपयोग अनुसन्धान आयोगका आयुक्तहरूलाई बोलाएर छलफल गरेका छन्।
प्रधानमन्त्री दाहालले आयुक्तहरूलाई प्रमुख आयुक्त लोकमानसिंह कार्कीविरूद्धको महाअभियोगको प्रक्रिया अघि बढिरहेको अवस्थामा पनि आयोगको कामकारबाही अगाडि बढाइराख्न सुझाएका छन्।
प्रधानमन्त्री दाहालले आफू भारत भ्रमणमा गएको बेला अख्तियारले पत्रकार सम्मेलन गरेर लडाकु शिविरमा ‘भ्रष्टाचार छानविन गर्ने’ भन्दै मुलुकको प्रधानमन्त्रीलाई ‘अपमान गरेको’ दुखेसो पोखेका छन्।
संविधान र कानुनको दायराभित्र रहेर अख्तियारले काम गर्नुपर्ने भन्दै प्रधानमन्त्री दाहालले आयुक्तहरूलाई भने, ‘यो मुलुकको कार्यकारी प्रधानमन्त्री हो, अख्तियार प्रमुख हैनन्।’ सबैले आ–आफ्नो दायरामा रहेर जिम्मेवारी निभाउनुपर्ने प्रधानमन्त्री दाहालले बताए।
अख्तियार प्रमुख लोकमानसिंह कार्कीविरूद्ध संसदमा महाअभियोग प्रस्ताव अगाडि बढिरहेको छ। एमाले र नेकपा माओवादी केन्द्रका १५७ सांसदले महाअभियोग प्रस्ताव दर्तापछि संसदमा त्यो प्रक्रिया अघि बढिरहेको छ।
अख्तियारमा अहिले पाँच जना आयुक्तहरू छन्। प्रधानमन्त्री दाहालले पाँचै आयुक्तहरूसँग छलफल गरेका थिए।
