नेपाल कांग्रेसका नेता रामचन्द्र पौडेलले स्थानीय तहको सिमा र संख्या तोक्नका लागि गठित आयोगले गरेको प्रस्तावलाई कांग्रेसले नमान्ने भन्दै स्थानीय तहको नयाँ संरचना बनाउँदा अहिले कायम रहेका इलाकालाई गाउँ र नगरपालिका बनाउने कांग्रेसको बटमलाईन भएको बताएका छन्।
मानसरोवरको तीर्थयात्राबाट फर्कनेक्रममा मंगलबार हुम्लाको सुर्केघाटमा आयोजित आमसभालाई सम्बोधन गर्दै नेता पौडलले संविधान कार्यान्वयन गर्न स्थानीय निकायको चुनाव अनिवार्य भएको र चुनाव हुन सबैभन्दा उत्तम अहिले कायम रहेको इलाकालाई गाउँ र नगरपालिकाको मान्यता दिनुको विकल्प नभएको स्पष्ट पारे।
नेता पौडेलले मुलुकको राजनीति स्थिर हुने नसकेको बताउँदै संविधान कार्यान्वयन गरेर मुलुकलाई स्थिरताको बाटोमा लैजानुपर्ने बताए। अहिले कुनै पनि राजनीतिक दलका नेताहरु संविधान कार्यान्वयनका लागि गम्भीर नबनेको आरोप पनि उनले लगाए। उनले संविधान र संघीयताको कार्यान्वयनसंगै हुम्लाका कृषि उत्पादन र पर्यटन व्यवसायको विकास हुने समेत विश्वास व्यक्त गरे।
पार्टी सभापति शेरबहादुर देउवाले आम कार्यकर्ताको मूल्याङ्कन गरेर पार्टीलाई एकढिक्का बनाउन नसकेको उल्लेख गर्दै आफूले पार्टी जोगाउन पार्टी शुद्धीकरण अभियान सुरुवात गर्ने नेता पौडेलको भनाइ थियो।