सरकारका मन्त्रीहरू कामै छोडेर गैरसरकारी संस्थाको सम्मान थाप्न दौडिएका छन्।
गृह मन्त्रालयले प्रमुख जिल्ला अधिकारीहरूलाई गैरसरकारी संस्थाका कार्यक्रममा सहभागी नहुन निर्देशन दिएकामा सरकारकै मन्त्री भने सम्मान थाप्न दौडिएका हुन्।
युवा तथा खेलकुद मन्त्री दलजित विके श्रीपाली मंगलबार दलित सम्बद्ध विभिन्न २२ वटा गैससले काठमाडौंको एउटा होटलमा गरेको सम्मान कार्यक्रममा सहभागी भएका छन्। गृह मन्त्रालयले काममा असर गर्ने भन्दै सिडिओहरूलाई गैससको कार्यक्रममा जान रोक लगाएकामा मन्त्री श्रीपाली भने खादा ओढ्ने रहर पूरा गर्न काम छोडेर गैससहरूले गरेको कार्यक्रममा सहभागी भएका हुन्।
यस्तै, वाणिज्य मन्त्री रोमी गौचन थकाली पनि बधाई ग्रहण गर्न भन्दै मन्त्रालयको काम छोडेर पार्टी प्यालेसको कार्यक्रममा सहभागी भएका छन्। पत्नीसहित खादा ओढ्न पुगेका मन्त्री गौचन दुई घण्टासम्म कार्यक्रममा बसेका थिए।
