नेकपा माओवादीले नेतृत्व गरेको ३३ दलीय मोर्चाले घोषणा गरेको १० दिने आमहडताल (कात्तिक २५ देखि मंसिर ५सम्म) विरुद्ध देशभित्र र बाहिर चर्को बिरोध भएपछि मोर्चाले आन्दोलनको कायक्रम सच्याउने तयारी गरेको छ।
मोर्चाका धेरै नेताहरु तिहार मनाउन काठमाडौं बाहिर गएकाले उनीहरु राजधानी फर्केपछि बैठक बसी निर्णय गर्ने जानकारी नेकपा माओवादीका एक उच्च नेताले सेतोपाटीलाई दिएका छन्।
‘पार्टीपंक्ति, बुद्धिजिवी र अन्तर्राष्ट्रिय समुदायको पनि सर्वसाधरणलाई मर्का नपर्ने गरी आन्दोलन गर्नु भन्ने सुझाव आएको छ, हामी मोर्चाको बैठक बसी चाँडै आन्दोलनको स्वरुप बारे निर्णय गर्नेछौ,’ ती नेताले भने।
मोर्चाको बैठकले औपचारिक निर्णय गरिनसकेको हुँदा आफ्नो नाम उल्लेख नगर्न आग्रह गर्दै ती नेताले भने, ‘सर्वसाधरण जनतालाई दुःख नहुनेगरी आन्दोलन गर्ने छौं।"
उनले आमहडतालको समय छोट्याउने वा आन्दोलनको स्वरुप नै परिवर्तन गर्ने भन्नेबारे मोर्चामा छलफल भईरहेको बताए ।
बुधवारमात्रै काठमान्डौंमा कुटनितिक नियोग भएका चीन, भारत, अमेरीका लगायतका २३ देशसहित संयुक्त राष्ट्रसंघका तर्फबाट संघका आवासिय संयोजकले विज्ञप्ति जारी गर्दै मोर्चाले आव्हान गरेको आमहडताल कानुन विरुद्ध हुने उल्लेख गरेका थिए ।
विज्ञप्तिमा भनिएको छ, "हिंसा वा हिंसाको धम्कीद्धारा गरिने बन्द हडताल राजनीतिक अधिकार वा नेपालको कानुनविरुद्ध छन् र शान्तिपूर्ण चुनावी अभियान रोक्ने कार्य गैरकानुनी हो ।"
मुख्य राजनीतिक पार्टीहरु र सरकारले पनि मोर्चाको बन्दविरुद्ध कडारुपमा प्रस्तुत हुने निर्णय गरेका थिए । गत सोमवार मन्त्रिपरिषद्का अध्यक्ष खिलराज रेग्मीको सरकारी निवास बालुवाटारमा मुख्य राजनीतिक दलका शिर्ष नेताहरु र रेग्मीविच आमहडताललाई असफल पारेर चुनाव जसरी पनि सम्पन्न गर्ने रणनितिका बारेमा छलफल भएको थियो ।
सरकारले बन्दका बेला मोर्चाका कार्यकर्ता सडकमा आए तुरुन्तै समात्ने र आवश्यक परे नेताहरुलाई पनि नियन्त्रणमा लिने रणनिति लिएको थियो ।
