वीरगन्ज चिनी मिल नजिकैको ऐलानी जग्गा माओवादी कन्द्रको भवन बनाउनको लागि दिने निर्णय स्थानीय सिफारिस समिति पर्साले फिर्ता गरेको छ। ऐलानी जग्गा माओवादीलाई दिने गत ५ गतेको निर्णय सिफारिस समितिले फिर्ता लिएको हो।
शुक्रबार बिहान जिल्ला प्रशासन कार्यालयमा पर्साका प्रमुख जिल्ला अधिकारी केशवराज घिमिरेको अध्यक्षतामा बसेको बैठकले जग्गा दिने सिफारिसको निर्णय बदर गरेको हो। माओवादीको भवन वा जग्गा नभएकाले पार्टी सञ्चालनमा अति नै कठिनाइ भएको भन्दै माग गरिएपछि प्रमुख जिल्ला अधिकारीको सभापतित्वमा ५ गते बसेको स्थानीय सिफारिस समिति पर्साले सो जग्गा उपलब्ध गराउन सिफारिस गरेको थियो।
समितिका संयोजक रहेका प्रमुख जिल्ला अधिकारी घिमिरेको अध्यक्षतामा बसेको बैठकले वीरगन्ज उपमहानगरपालिका-१७ स्थित कित्ता नम्बर ७५ को १ बिग्गा ११ धुरमध्येको जग्गाबाट ५ कठ्ठा जग्गा भोग अधिकारका लागि दिने निर्णय गरेको थियो। शुक्रबार बिहान बसेको बैठकमा स्थानीय विकास अधिकारी विश्वप्रकाश अर्याल, उप-महानगरपालिकाका कार्यकारी अधिकृत विष्णुप्रसाद कोइराला, नापी अधिकृत नागेन्द्र महतो र मालपोत कार्यालय पर्साका प्रमुख गमबहादुर विकको उपस्थिति थियो।
जग्गा दिने सिफारिको निर्णय बदरपछि सत्तासाझेदार नेपाली कांग्रेस, संयुक्त लोतकतान्त्रिक मधेसी मोर्चामा रहेका मधेसी दलहरूले बुधबार बिरोध जनाउँदै निर्णय फिर्ता लिन मागसमेत गरेका थिए। सिफारिसको बिरोधमा एमाले पार्टी पर्साले बुधबार नै जिल्ला प्रशासन कार्यालयको घेराउ गरी शुक्रबारको अल्टिमेसन दिएको थियो।
वीरगन्ज चिनी कार्यालय नजिकै रहेको उक्त जग्गा मूल्यवान भएको कारण नै स्थानीय नेताहरूले उक्त जग्गा पाउन माग गरेको स्थानीयको आरोप छ। सिफरिस गरिएको जग्गा आसपासमा अढाइदेखि पाँच लाख धुरमा जग्गा बिक्री भइरहेका छन्। जसले गर्दा सो जग्गाको न्यूनतम मूल्य अढाइ करोडभन्दा बढी रहेको छ।
