सत्तासाझेदार नेपाली कांग्रेसले सरकारमा पठाउने थप १३ मन्त्रीको नाम टुंगो लगाएको छ।
माओवादी केन्द्रसँगको गठबन्धन सरकार बनेको २३ दिनमा मात्र कांग्रेसले बाँकी १३ मन्त्रीको नाम प्रधानमन्त्रीलाई बुझाएको हो।
यसअघि कांग्रेसका दुई मन्त्रीले शपथ लिइसकेका छन्।
योसँगै पुष्पकमल दाहाल नेतृत्व सरकारमा कांग्रेसको भागमा १५ मन्त्रालय परेका छन्। यसअघि १३ मन्त्रालय दिने समझदारी भए पनि आन्तरिक भागबन्डा मिलाएर मन्त्रालय थपिएको छ।
जसमध्ये पार्टी सभापति देउवाको भागमा ८, वरिष्ठ नेता रामचन्द्र पौडेलको भागमा ५, कृष्णप्रसाद सिटौला र खुमबहादुर खड्काको भागमा एक-एक मन्त्रालय परेका छन्।
आन्तरिक भागबन्डाको समस्या टुंगिएपछि बिहीबार कांग्रेसले आफ्नोतर्फका बाँकी १३ मन्त्रीको नाम टुंग्याएको हो।
कांग्रेस नेता डा. प्रकाशशरण महतले बिहीबार राती मन्त्रीको नाम प्रधानमन्त्रीलाई बुझाइएको जानकारी दिए।
शुक्रबार बिहान ९ बजे राष्ट्रपति कार्यालयमा मन्त्रीहरूको पद तथा गोपनियताको सपथ कार्यक्रम तय भएको छ।
यसअघि २० साउनमा प्रधानमन्त्रीमा प्रचण्डले सपथ लिएलगत्तै कांग्रेसका तर्फबाट उपप्रधानमन्त्री तथा गृहमन्त्रीमा विमलेन्द्र निधि र भौतिक योजना तथा यातायात मन्त्रीमा रमेश लेखकले सपथ लिएका थिए ।
कांग्रेस भ्रातृ संस्था नेविसंघको २३ देखि २५ सम्म तोकिएको ११ औं महाधिवेशन १२ दिनसम्म लम्बिंदा कांग्रेसबाट मन्त्री छान्न ढिलाई भएको थियो। आन्तरिक भागबण्डालेसमेत कांग्रेसका मन्त्री छनोटमा २३ दिन लागेको हो।
कुन मन्त्रीलाई कुन मन्त्रालय?
- अर्जुननरसिंह केसी - सहरी विकास
- प्रकाशशरण महत - परराष्ट्र
- बालकृष्ण खाँड - रक्षा
- सूर्यमान गुरूङ - श्रम तथा रोजगार
- केशवकुमार बुढाथोकी - सामान्य प्रशासन
- रोमी गौचन थकाली - वाणिज्य
- सीतादेवी यादव - शान्ति तथा पुनर्थापना
- जीवनबहादुर शाही - पर्यटन
- दीपक गिरी - सिँचाइ
- नवीन्द्रराज जोशी - उद्योग
- शंकर भण्डारी - वन
- गगन थापा - स्वास्थ्य
- हृदयराम थानी - सहकारी तथा गरिबी निवारण
