नेपाली कांग्रेसका सभापति शेरबहादुर देउवाले डेढ वर्षभित्र संविधानले परिकल्पना गरेका तीनवटै तहको निर्वाचन हुने दाबी गरेका छन्।
गौरा पर्व मनाउन बिहीबार अपराह्न काठमाडौंको खुलामञ्च पुगेका सभापति देउवाले स्थानीय, प्रदेश र संघीय तहको निर्वाचन हुनेमा शंका नगर्न आग्रह गरे। प्रमुख प्रतिपक्षी नेकपा एमालेले निर्वाचन नगरेर मुलुकमा संवैधानिक रिक्तता कायम गर्ने षड्यन्त्रस्वरुप आफ्नो नेतृत्वको सरकार ढालिएको दाबी गर्दै आएकामा देउवाले लोकतन्त्रमा निर्वाचन अपरिहार्य हुने भएकाले तिनै तहको निर्वाचन गराएर देखाउने बताए।
देउवाले कुन तहको निर्वाचन कहिले हुन्छ भन्ने बारेमा भने केही उल्लेख गरेनन्। गौरा पर्वका अवसरमा शुभकामना दिने क्रममा जम्मा तीन मिनेटमात्र बोलेका कांग्रेस सभापति देउवाले संघीयता कार्यान्वयनमा आएपछि सबै जातजातिको भाषा र संस्कृति अझ मजबुत हुने बताए।