नेकपा एमालेका अध्यक्ष केपी शर्मा ओलीले संविधान संशोधनका विषयमा प्रधानमन्त्री पुष्पकमल दाहालले भारतीय प्रधानमन्त्री नरेन्द्र मोदीलाई लेखेको पत्रबारे आफूलाई आधिकारिकरुपमा जानकारी नरहेको भन्दै टिप्पणी गर्न आवश्यक नरहेको बताएका छन्।
एमाले अध्यक्ष ओलीले बिहीबार अपरान्ह स्वास्थ्य उपचारका लागि थाइल्याण्डको बैंकक प्रस्थान गर्नुपहिले त्रिभुवन अन्र्तराष्ट्रिय विमानस्थलमा संचारकर्मीसँग कुरा गर्दै प्रधानमन्त्री दाहालले पठाएको पत्रबारे टिप्पणी नगर्ने बताएका हुन्।
प्रधानमन्त्री दाहालले मधेशवादी र आदिवासी जनजाति सम्बद्ध दलका असन्तुष्टि सम्बोधन हुने गरी संविधान संशोधन गरेर निर्वाचन गराउनु सरकारको प्राथमिकता भएको पत्र आफ्ना विशेष दूत उपप्रधानमन्त्री तथा गृहमन्त्री बिमलेन्द्र निधिमार्फत भारतीय प्रधानमन्त्री मोदीलाई बुझाएका थिए।
ओलीले तत्कालका लागि संविधान संशोधन एमालेको विषय नभएको र एमालेसँग यसबारे कुनै दलले छलफल नगरेको पनि बताए।
मन्त्रीपरिषद् गठन गर्न नै कति महिना लाग्ने भन्ने टुंगो नरहेको अवस्थामा जनताले सरकारबाट खासै अपेक्षा नगरेको एाले अध्यक्ष ओलीको दाबी छ।
उनको बैंककस्थित बुमरङगार्ड अस्पतालमा उपचार गराउने कार्यक्रम छ। ओलीलाई काँग्रेस नेतृत्वको सरकारका पालामा दुई वर्ष पहिले मेनेन्जाइटिस हुँदा राज्यकोषको एक करोड रुपैयाँभन्दा बढी रकम खर्च गरेर बुमरङगार्ड अस्पतालमा नै डेढ महिना राखेर उपचार गराइएको थियो।
उनी बैंककमा उपचारपछि त्यतैबाट इण्डोनेशिया जाने र दुई सातापछि मात्र स्वदेश फर्कने कार्यक्रम छ।