निर्वाचन आचारसंहिताको धज्जी उडाउँदै एकीकृत नेकपा माओवादीले मोरङ उर्लाबारीमा एक घन्टा राजमार्ग अबरूद्व गराएर चुनावी सभा गरेको छ । एमाओवादीको मेची–महाकाली अभियान अन्तर्गत बुधबार क्षेत्र नं. ९ अन्तर्गत पर्ने उर्लाबारी चोकमा आमसभा थियो ।
यो सभामा पार्टी अध्यक्ष पुष्पकमल दाहाल, वरिष्ठ नेता बाबुराम भट्टराई, नारायणकाजी श्रेष्ठ, वर्षमान पुन लगायत नेताहरू थिए । दिउँसो २ बजेदेखि आधा घन्टा पूर्वपश्चिम राजमार्गको उर्लाबारी चोक–स्कुलडाँडा एक किलोमिटर सडक अबरूद्व पारिएका हो ।
एमाओवादीको अनुरोधमा प्रहरीले यो अवधिभर राजमार्ग बन्द गराएर भित्री सडकबाट सवारी आवागमन गराएका थिए । मञ्चबाट एमाओवादीले भित्री बाटोबाट गाडी सञ्चालन गराइदिन अनुरोध गरेपछि प्रहरी स्वयम्सेवक बनेको हो । प्रहरीले माओवादी सभाका क्रममा घरको छत तथा रेलिङबाट हेरिरहेका स्थानीयलाई मैदान उतारेको पनि थियो ।
निर्वाचन आचारसंहिता अनुसार राष्ट्रिय राजमार्ग अबरूद्व पारेर चुनावी सभा गर्न पाइँदैन । ‘माओवादी सभाभरि भित्री बाटोबाट सवारीसाधन कटाइएको थियो,’ नेपाली कांग्रेसका स्थानीय नेता बीरबल थापाले सेतोपाटीसँग भने, ‘सार्वजनिक स्थललाई असहज बनाएर यसरी सभा गर्न नहुने हो ।’
बुधबार एमाओवादीले यो अभियानका क्रममा काँकडभिट्टा, सुरुङ्गा, दमक, विर्तामोड, उर्लाबारी, पथरी,विराटचोक, इटहरी र विराटनगरमा सभा गरिरहेको छ । कडा सुरक्षाबीच आएका अध्यक्ष दाहालले राष्ट्रलाई एकताबद्व गर्ने जिम्मेवारी आफ्नो पार्टीलाई आएको जनताको हृदयबाट बुझेर अभियान थालेको बताए ।
भट्टराई र श्रेष्ठलाई अतिथिका रूपमा मञ्चमा आसन गराइए पनि सम्बोधन गर्ने कार्यक्रम दाहाललाई मात्र थियो । दाहालले सम्बोधनका क्रममा जनयुद्धमा सहिद भएका, घाइते, बेपत्ता र अपाङ्ग भएकाहरुको सपना साकार पार्न संविधानसभालाई एउटा अवसरको रुपमा लिएर एमाओवादीलाई बहुमत दिन अनुरोध गरे । ‘संविधानसभा एउटा अवसर र चुनौतीको रूपमा फेरि एकपटक आएको छ,’ पन्ध्र मिनेटको छोटो सम्बोधनमा दाहालले भने, ‘पहिचानसहितको संघीयता, आर्थिक विकासका लागि हामीले जित्नैपर्छ, नेपाली जनताले जित्नैपर्छ ।’
एकीकृत माओवादी स्थानीय नेतृत्वले दाहालको सभाभरि यातायात अवरुद्व नपारिएको जिकीर गरे । ‘जनताको भीड बढी भएकाले यातायात भित्री बाटोबाट कटाइदिन हामीले इन्स्पेक्टर साहेबलाई सहयोग मागेका थियौं,’ एकीकृत माओवादी उर्लाबारी गाउँ कमिटी अध्यक्ष दिलीप सुब्बाले भने, ‘खासै अवराध भएको हैन, फाटफुट त चलिरहेका थिए ।’
दाहालको सभामा स्कर्टिङका लागि निस्किएका जिल्ला ट्राफिक प्रहरीका इन्स्पेक्टर खेमबहादुर केसी र सभाभरि एमाओवादीको स्वयम्सेवक बनेका इलाका प्रहरी कार्यालय उर्लाबारीका इन्स्पेक्टर खगेन्द्र खड्काले राष्ट्रिय राजमार्ग बन्द नभएको दाबी गरे । ‘राष्ट्रिय राजमार्ग बन्द गराउनु आचारसंहिताविपरीत हुन जाने भएकाले उनीहरुले आग्रह गरे पनि बन्द गराउन दिएनौं,’ इन्स्पेक्टर खड्काले भने ।
एमाओवादीले आचारसंहिता उल्लंघन गर्दै सभा गरेको विषयमा प्रतिक्रिया दिँदै एमाले क्षेत्र नं. ९ का उम्मेदवार घनश्याम खतिवडाले भने, ‘आचारसंहिता विपरीत कार्य गर्नेलाई कारबाही हुनुपर्छ । यो कानुनको उपहास हो ।’