एकीकृत नेकपा माओवादीका अध्यक्ष पुष्पकमल दाहाल(प्रचण्ड)ले सुर्खेत जिल्लाको विकासका लागि आधा दर्जन बढी आश्वासन दिएका छन् । आज सुर्खेतको वीरेन्द्रनगरमा आयोजित आमसभालाई सम्बोधन गर्दै उनले अबको निर्वाचनमा एमाओवादीलाई बहुमतसहित विजयी भए त्यसपछि बन्ने सरकारले सुर्खेत जिल्लाको समग्र विकास पहिलो प्राथमिकतामा पर्ने बताए ।
अध्यक्ष दाहालले सुर्खेतको लाटिकोइलीमा रहेको नेपालकै ऐतिहासिक काँक्रेविहार भग्नावशेषको पुननिर्माण गर्ने, सुर्खेत विमानस्थललाई क्षेत्रीय विमानस्थलको रुपमा स्तरोन्नती गर्ने, नेपालकै ठूलो दावी गरिएको चौकुने सिमेन्ट उद्योग सञ्चालन गर्ने, सुर्खेत–कोहलपुर १३२ केभिए विधुत प्रसारण लाईन विस्तार गर्ने, सुर्खेतलाई भेरी–कर्णाली संघीय राज्यको राजधानि बनाउने लगायतका आधा जर्दन बढी आश्वासले दिएका हुन्।
उनले सुर्खेत प्रशासनिक दृष्टिले सुरक्षित, शैक्षिक केन्द्र, प्राकृतिक रुपमा सम्पन्न र रणनीतिक रुपमा महत्वपूर्ण जिल्ला भएको भन्दै यसको विकासका लागि आफ्नो पार्टी गम्भिर भएको जिकिर गरे । आगामी मंशिर ४ गते हुने संविधानसभा निर्वाचनका लागि पार्टीले सुर्खेतबाट समानुपातिकतर्फको उम्मेद्वार चयनमा सन्तुलन नमिलेको भन्दै त्यसलाई पछि मिलाईने समेत बताए ।
अध्यक्ष दाहालले अघिल्लो पटकको संविधानसभा निर्वाचनबाट एमाओवादी सबैभन्दा ठूलो पार्टी भएपनि बहुमत नभएकाले संविधान बनाउन नसकेको बताए । ८० प्रतिशत काम सम्पन्न भइसक्दा पनि बहुमत नभएकै कारण पूर्ण हुन नसकेको उनको भनाइ थियो । अबको निर्वाचन भएको ६ महिनाभित्र पहिलो मस्यौदा सार्वजनिक गर्ने र १ वर्षभित्र संविधान निर्माण भइसक्ने दाहालको दावी छ ।
