संविधानसभा निर्वाचनको मिति नजिकिँदै जाँदा मुलुकभर बढ्दै गएको हिंसात्मक श्रृंखलाका घटनाविरुद्ध विभिन्न राजनीतिक दल, तिनका नेता तथा उम्मेदवारहरुलगायत सर्वसाधारणले सरकारको फितलो सुरक्षा व्यवस्थाप्रति आलोचना गरिरहेका बेला सरकारले देशका विभिन्न भागबाट १ सय ९४ जनालाई पक्राउ गरेको छ।
निर्वाचनको प्रक्रिया सुरु भएदेखि गत सातासम्ममा प्रहरीले ताप्लेजुङ, इलाम, पाँचथर, झापा, धनुषा, नुवाकोट, मोरङ उदयपुर, बारा, सिन्धुली, रुपन्देही, दाङ, जाजरकोट, सुर्खेत,डोटी, डढेल्दुरा, कैलाली, कञ्चनपुर लगायतका जिल्लाबाट १ सय ८७ वटा निर्वाचन विरोधी घटनामा संलग्न रहेको आरोपमा त्यो संख्याका अभियोगी पक्राउ गरेको हो।
नेपाल प्रहरीका प्रवक्ता एवम् वरिष्ठ प्रहरी उपरिक्षक गणेश केसीले सेतोपाटीसँग शनिबार भने, ‘यसरी पक्राउ परेका मध्ये ७१ जनालाई कर्तव्य ज्यान, ज्यान मार्ने उद्योगमा संलग्न भएको र सार्वजनिक अपराधको कसुरमा कानुन बमोजिम मुद्दा चलाइएको छ।’
प्रवक्ता केसीका अनुसार, अहिलेसम्म, गोली चलाएर उम्मेदवार हत्याको आरोपमा नेकपा एमालेका पूर्वसभासद रामचन्द्र प्यासी कुसवाह लगायत तीन जनाविरुद्ध बारा क्षेत्र नम्बर ४ बाट पार्टीका उम्मेदवार महमुद आलमको हत्या आरोपमा मुद्दा चलाइएको छ।
बाराको घटनाबाहेक अन्य ठाउँका निर्वाचन विरोधी अधिकांश घटनामा मोहन बैद्य नेतृत्वको नेकपा माओबादी पार्टीको संलग्नता छ। त्यसका साथै पूर्वी पहाडी जिल्लाका कतिपय घटनामा संघीय लिम्वुवान राज्य परिषद्को र कतिपय स्थानमा अपराधिक समूहको संलग्नता रहेको केसीले बताए।
प्रवक्ता केसीका अनुसार कुल १ सय ८७ निर्वाचन विरोधी घटनामध्ये, हत्याको घटना १, गोली प्रहारको घटना २, निर्वाचन प्रचारप्रसार सामग्रीको लुटपाट सम्बन्धी १९ वटा घटना, राजनीतिक दलको प्रचार सामग्री लुटपाट सम्बन्धी २ वटा घटना छन्।
त्यसैगरी सामान्य भिडन्त १९ वटा, ढुंगामुढा २ वटा, कुटपिट १७, धारिलो हतियारको प्रहार एक, दलका नेता तथा उम्मेदवारको बाटो अवरोध सम्बन्धी १७ वटा घटनाहरु भएको केसीले बताए।
त्यस्तै, प्रहरीले देशका १३ ठाउँबाट शंकास्पद हक्स बमहरु फेला पारेको छ । साथै लिम्वुवानको विरोध र्याली एक, सरकारी तथा निजी सवारी साधनका अलावा विभिन्न राजनीतिक दलका उम्मेदवारहरुको सवारी साधन तोडफोड र आगजनी सम्बन्धी घटनाहरु ४६ वटा छन््।
निर्वाचनको विरोधमा जेहाद छेडेको बैद्य माओबादीका कार्यकर्ता लगायत अज्ञात समूहको नाममा राजधानी लगायत देशका विभिन्न भागमा दिनदहाडै तोडफोड, आगजनी, कुटपिट र हिंसात्मक क्रियाकलाप गर्दा पनि त्यस्ता कार्यमा संलग्न व्यक्तिहरुलाई प्रहरीले घटनास्थलबाट पक्रन नसकेकोबारे प्रवक्ता केसीले निर्वाचन विरोधी समुहहरुले हिट एण्ड रनको नीति अपनाएको बताए।
‘उनीहरुले तोडफोड, आगजनी र लुटपाट गरी भागे पनि सबै अंगका सुरक्षाकर्मीहरुले घटनामा संलग्न व्यक्तिहरुको पहिचान गरी खोज्ने र पक्राउ गर्ने र थप घटना रोक्ने कार्य जारी छ,’ केसीले भने।
