एमाओवादीका नेताहरू हेलिकप्टर चढेर देशदौडाहा गएकामा सर्वत्र आलोचना भएको छ। निर्वाचन आयोगले पनि आचारसंहिता प्रतिकूल हुनेगरी हेलिकप्टर प्रयोग नगर्न सचेत गराएको छ।
एनेकपा माओवादी आजका दिनमा ठूलो पार्टीमात्र होइन, साधन र स्रोतले सबैभन्दा सम्पन्न पार्टी पनि हो। देशदौडाहा व्यवस्थापन गर्न एमाओवादीका शीर्ष नेतालाई त्यसकारण पनि सजिलो भएको छ।
एमाओवादीका शीर्ष नेताहरू विशेषगरी पार्टी अध्यक्ष प्रचण्ड र नेता बाबुराम भट्टराई देशभरिका चुनावक्षेत्रमा पुगेर निर्वाचन अभियानमा जुट्न सक्नुमा साधन र स्रोतको मात्र भूमिका भने छैन, जसरी साधन र स्रोतकै अभावले मात्र नेपाली कांग्रेस र एमालेका शीर्ष नेताहरू चुनावी अभियानमा परिचालित नभएका होइनन्।
चुनाव परिणाम आफ्नो पोल्टामा पार्न एमाले र कांग्रेसका शीर्ष नेताहरू आफ्नै चुनाव क्षेत्रमा डटिरहेकाले एमाओवादीका शीर्ष नेताहरूले राष्ट्रव्यापी चुनाव अभियानमा एकछत्र हुने मौका पाएका हुन्।
दाहाल र भट्टराई दुवै आ–आफ्ना निर्वाचन क्षेत्रमा सुरक्षित देखिएका छन्। भट्टराईले आफ्नो गृहजिल्ला गोरखामा खासै चुनौती महसुस गरेका छैनन्। एमाले तुलनात्मक रुपमा बलियो रहेको र पार्टी सचिव विष्णु पौडेल उम्मेदवार रहेको रुपन्देही– ४ बाट पनि आफ्नो उम्मेदवादी दिएर भट्टराईले त्यो क्षेत्रमा 'चान्स' लिएका छन्।
दाहाललाई उनको पुरानो निर्वाचन क्षेत्र काठमाडौं– १० मा पहिलेजत्तिकै सजिलो छैन। एमालेले कीर्तिपुरका स्थानीय नेता सुरेन्द्र मानन्धरलाई टिकट दिएकाले नेवार समुदायको भोट बढाएर उनले दाहाललाई चुनौती थपेका छन्। तर, दाहाल नै अहिले पनि काठमाडौं– १० मा अग्रस्थानमा छन्। र, आफूले जित्नेमा ढुक्कै देखिन्छन्।
मधेससँग प्रेम बसेको र मधेसबाट पनि चुनावमा उठ्ने धेरै पहिले घोषणा गरेका दाहालले गहिरो चुनावी आँकलनपछि सिरहा– ५ बाट पनि उम्मेदवारी दिएका छन्। धनुषा– ६ मा लामो समयसम्म आँखा गाढेका दाहालले जनकपुरमै दुई रात बसेर उक्त क्षेत्रको सम्भावना तौलेपछि अन्ततः सिरहा– ५ बाट उम्मेदवारी दिने निर्णय गरेका हुन्।
सिरहाको यो क्षेत्र त्यसै पनि पहिलेदेखि नै कम्युनिष्ट कार्यकता र आन्दोलनका लागि उर्वर क्षेत्र हो। २०४८ सालमा पनि माओवादीले संयुक्त जनमोर्चामार्फत पहिलो संसदीय निर्वाचन उपयोग गर्दा जनमोर्चाका उम्मेदवार विष्णुलाल तामाङले सिरहाको यो भेगबाट चुनाव जितेका थिए।
दलित मतदाताको बाहुल्य रहेको यो क्षेत्रमा गत संविधानसभाको निर्वाचनमा पनि एमाओवादीका उम्मेदवार महेन्द्र पासवान १२, ११० मत ल्याएर विजयी भएका थिए। उनका निकटतम प्रतिद्वन्द्वी एमालेका धर्मनाथ शाहले पासवानको ६० प्रतिशत पनि मत ल्याउन सकेनन्।
आफ्ना दुवै चुनावी क्षेत्रमा निकै आश्वस्त देखिएका दाहालले विगत दुई हप्तामा चुनावी दौडाहालाई तीव्रता दिएका छन्। पछिल्ला दुई सातामा दाहालले २६ जिल्ला पुगेर ४४ वटा आमसभालाई सम्बोधन गरेका छन्। २१ घन्टाभन्दा बढी हेलिकप्टरमा उडेका छन्।
दाहालजत्तिकै धपेडीमा नभए पनि एमाओवादीका नेता भट्टराई आफ्नो चुनाव क्षेत्रभन्दा फरक जिल्लाको निर्वाचन अभियानमा पनि प्रशस्तै पुगिरहेका छन्। उनले मुगु, हुम्ला, ओखलढुंगा, काठमाडौंलगायतका चुनावी सभाहरूलाई सम्बोधन गरिसकेका छन्।
आफ्नो निर्वाचन क्षेत्रबारे पूर्णरुपमा विश्वस्त रहने गिरिजाप्रसाद कोइराला नेपाली कांग्रेसको चुनावप्रचार अभियानको बागडोर सम्हाल्थे। २०५१ सालको मध्यावधि निर्वाचनमा तत्कालीन प्रधानमन्त्री कोइरालाले हेलिकप्टर लिएर एकै दिनमा १३ वटासम्म आमसभा सम्बोधन गरेको प्रसंग अझै चर्चित छ। त्यसबेला हेलिकप्टर चढ्न नपाउने आचारसंहिताको व्यवस्था निर्वाचन आयोगले गरेको थिएन।
यसपालि भने कांग्रेस तथा एमालेका शीर्ष नेताहरूलाई प्रतिद्वन्द्वीको चुनौती र कतिलाई त्योभन्दा बढी विगतको भयले आफ्नै चुनावी क्षेत्रमा अल्झाएको छ।
पछिल्लो संविधानसभाको चुनाव हारेका नेपाली कांग्रेस सभापति सुशील कोइराला आफ्नो पुरानो निर्वाचन क्षेत्र बाँके–३ मा अझै कडा मेहनत गरिरहेका छन्। चितवन– ४ मा आफ्नै पार्टीका बागी तथा पूर्व कांग्रेस जिल्ला सभापति विकास कोइरालाका कारण अप्ठ्यारो झेल्दै छन्। उनी पहिलोपटक हेलिकप्टर चढेर आफ्ना निकट सहयोगी संखुवासभा– २ का उम्मेदवार दीपक खड्काको चुनावी सभामा भाग लिन आगामी २७ गते संखुवासभा जाँदैछन्।
पछिल्लो संविधानसभा चुनावमा दुवै क्षेत्रबाट हारेका एमाले नेता माधव नेपाल र एमालेको परमपरागत गढ झापा- ७ बाट हारेका खड्गप्रसाद ओलीले पनि आफ्ना निर्वाचन क्षेत्रबाहिर पुग्ने उत्साह देखाएका छैनन्। नेपाललाई रौतहट– १ र काठमाडौं– २ मा घरदैलो नै भ्याइनभ्याई छ।
इलाम– १ बाट अघिल्लो पटक निर्वाचित र अहिले त्यही क्षेत्रबाट उम्मेदवारी दिएका एमाले अध्यक्ष झलनाथ खनाल ‘लिम्वुवान’मा एमाले पहिचानविरोधी भएको प्रतिद्वन्द्वी पार्टीहरूको आक्रामक प्रचारका कारण रक्षात्मक स्थितिमा छन्। एमाले पार्टी छाडेर गएका अशोक राईले नेतृत्व गरेको संघीय समाजवादी पार्टीका कारण पनि लिम्वुवानमा एमालेको भोट काटिने डरले खनाल आफ्नो निर्वाचन क्षेत्रमा डटेर बसेका छन्।
२०४८ सालदेखि नै प्रत्येक निर्वाचन जित्दै आएका कांग्रेस नेता शेरबहादुर देउवा पनि आफ्नो चुनाव क्षेत्र डडेलधुरा र कैलाली– ६ बाहेक सुदूरपश्चिमकै केही जिल्लामा मात्र चुनाव प्रचारमा गएका छन्। देशभरिको चुनावी अभियानमा उनले कुनै लगाव देखाएका छैनन्।
कैलाली–६ मा तुलनात्मक रूपमा सहज महसुस गरेका देउवाले यसपालि डडेलधुरामा भने एमाओवादीका खगराज भट्टबाट कडा चुनौती पाउने अनुमान गरिँदै छ।
कांग्रेस तथा एमाले शीर्ष नेताहरू आफ्नै निर्वाचन क्षेत्र र वरिपरिमात्र सीमित रहँदा देशव्यापी दौडाहामा एमाओवादी नेता एकछत्र छाएका छन्।