दसैं मानेर नेपालगन्ज छाडेका सुशील कोइराला दुई सातापछि बुधबार नेपालगन्ज फर्किए। चुनावी माहोल त्यसमाथि बाँके–३ बाटै उम्मेदवारी दिएकाले एयरपोर्टमा स्वागत गर्न आउनेहरुको घुइँचो अघिपछिभन्दा निकै ठूलो थियो।
चुनावको छेकोमा राष्ट्रिय पार्टीको सभापति गृहजिल्ला आउँदा पत्रकारहरुको भिड पनि साविकभन्दा निकै ठूलो हुने भैहाल्यो।
बुद्ध एयरको विमानबाट ओर्लनेबित्तिकै कांग्रेसका नेता, कार्यकर्ता मात्र हैन, पत्रकारहरु नै जिल परे। हाँसोठट्टा चल्यो, ‘सभापति स्पोर्ट सुज र जिन्समा कस्सिएरै आएछन् त।’
कोइराला जोक गर्ने स्वभावका हैनन्। उनलाई हाँसोले खासै छोएन।
आफ्नो ‘कमन’ पहिरनमा कोइराला थिएनन्। त्यो नै एयरपोर्टमा चर्चाको बिषय बनिरह्यो। नेपालगन्जका लोकल मात्र हैन, कोइरालाको चुनावी अभियान नेतृत्व गरेर बाँकेमै पाहुना बसिरहेका आनन्दप्रसाद ढुंगानादेखि पूर्वमन्त्री सुरेश मल्लसम्म चकित परे।
‘सुशील दा’ले जिन्स पाइन्ट र स्पोर्ट सुज लगाएरै सबैको ध्यान तान्नुभयो,’ एयरपोर्ट पुगेकी सगरमाथा टेलिभिजनकी रिपोर्टर दीपा आलेले टेलिफोनमा सेतोपाटीसँग भनिन्।
नेपालगंजलाई कर्मथलो बनाएर आलेले पत्रकारिता थालेको आठ वर्ष नाघिसक्यो। कोइराला नेपालगन्ज भएको बेला उनले पछ्याइरहेकी हुन्छिन्।
‘मैले अहिलेसम्म जिन्स पाइन्ट र स्पोर्ट सुजमा देखेकी थिइनँ,’ उनले भनिन्, ‘यसपाला चुनावी दौडाहाका लागि स्पोर्ट सुज लगाएर कस्सिएरै आ’का छन् भन्न ठट्टा व्यापक भइरहेको छ।’ अब कसले भेट्टाउला र ! भन्ने ठट्टा पनि जारी छ।
कोइराला निकट केही कार्यकर्ताले स्वकीय सचिव लक्ष्मण ढकालसँग ‘पहिरन रोजाइ’बारे सोधेका पनि थिए।
कोइरालाले बिहीबार निलो जिन्स र स्पोर्ट सुजमै घरदैलो गरे। ‘सुशील दा हिजो बिहान बेलरी र दिउँसो खजुरा सुर्त गाविस जानुभयो,’ निर्वाचन प्रचार समिति सदस्य पोषण केसीले भने।
पहिरनमा खासै सतर्क नदेखिने कोइरालालाई स्पोर्ट सुज, जिन्समाथि सेतो सर्ट र अण्डीको कोट खुलेको थियो।
मधेसी वस्तीमा घरदैलो गर्दा पनि उनले त्यही पोशाक रोजे। शीरको कालोटोपी झन् सुहाएको थियो। गलामा मालाको भारी थिएन। न त घाँटीमा गम्छा।
मतदाताको भूगोल, भाषा र भेषअनुसार पहिरन फेर्न उनको मन गएन। जुन लुगा लगाएर नेपालगन्ज झरेका थिए, त्यसैमा घरदैलो हिँडे।
सुशीलजस्तै एमाले नेता माधवकुमार नेपाल काठमाडौं–२ र रौतहट–१ बाट उठेका छन्। रौतहटमा उनी पाइजामा सुरुवालमा चप्पल लगाएर रित्तो टाउको घरदैलो गर्छन्। काठमाडौं फिरेर कोट पाइन्टमा गाउँ वा नगर घुम्छन्।
कोइराला पहाडियाहरुको बर्चस्व रहेको चितवन–४ मा पाँचदिने अभियान सकेर आफ्नो अर्को निर्वाचन क्षेत्र भ्याउन नेपालगन्ज गएका हुन्।
केसीका अनुसार कोइरालाले तिहारभरिमा ७ वटा गाविस र नगरपालिकाको घरदैलो लगायत चुनावी कार्यक्रम सक्ने कार्यक्रम बनेको छ। भ्याएसम्म उनी अरु निर्वाचन क्षेत्र पनि पुग्छन्।
तस्बिर: दीपा आले
