एमाओवादी अध्यक्ष पुष्पकमल दाहाल (प्रचण्ड) ले एमाओवादी नेतृत्वमा देशभर लहर सिर्जना हुन थालेपछि संविधानसभा भाँड्न अत्यन्तै गम्भीर षड्यन्त्र हुन थालेको बताएका छन्। आफूलाई असाध्यै क्रान्तिकारी भन्ने, प्रतिक्रियावादी र घोर दक्षिणपन्थी शक्तिहरु एकै ठाउँमा उभिएर संविधानसभाको निर्वाचन भाँड्न लागिपरेको दाहालले बताए। ‘हामीले पार्टीलाई राष्ट्रको नेताको रुपमा प्रस्तुत गरेका छौं। र, यसलाई आम जनताले स्वीकार गरेको देशभर घुम्दा मैले पाएँ,’
गोरखा सदरमुकामस्थित ठूलो आँगनमा भएको कोणसभामा दाहालले भने, ‘तर, यसका बिरुद्ध गम्भीर षड्यन्त्र भैरहेका छन्। अत्यन्त्रै गम्भीर। जब, अब देशभर एमाओबादी पक्षमा लहर आउँदै गयो, परिवर्तनको पक्षमा, माओवादी नेतृत्वमा लहर देखिँदै जान थालेपछि प्रतिक्रियावादी, घोर दक्षिणपन्थीहरु एकै ठाउँमा जम्मा भएर यो संविधानसभा बिथोल्ने, भाड्ने, षड्यन्त्र गर्ने, झुठ्ठा प्रचार गर्ने, बिभिन्न खालका अबरोध सिर्जना गर्न थालेका छन्।’
एमाओवादीबाट अलग्गिएको नेकपा–माओवादीलगायत कांग्रेस, एमालेले संविधानसभा भाड्न चाहेको दाहालले आरोप लगाए। ‘तपाईं हामी कसैले पनि यो नसोचौं कि हामीबाट अलग्गिएको बैद्य माओबादीले मात्रै ठूलो अवरोध गर्न खोज्नुभएको छ,’ अध्यक्ष दाहालले भने, ‘म तेह्रथुम गएँ। रातभर रुख ढालियो। त्यहाँ साथीहरुले भन्नुभयो, कांग्रेसका कार्यकर्ता र एमालेका कार्यकर्ता पनि सँगसँगै रुख ढाले। हामीले देख्यौं, नाम बताउनुभयो।’ पराजित मानसिकता भइसकेपछि घोर दक्षिणपन्थी र उग्र जडसूत्रवादी एकै ठाउँमा उभिएको दाहालको भनाइ छ।
दाहालले एक बर्षभित्रमा संबिधान निर्माणका लागि एमाओबादीलाई बहुमतले जिताउन आग्रह गरे । ‘मधेशमा गुणात्मक लहर आउँदैछ,’ दाहाल भन्छन्, ‘म प्रष्टै भन्न चाहन्छु, बाजुरा, तेह्रथुम, डडेलधुराजस्ता जिल्लाहरूमा हामीले अत्याधिक बहुमतले जित्दैछौं।’ नेपाली जनताले २००७ सालमा दिएको जिम्मेवारी कांग्रेसले राजा महेन्द्रसँग २०१५ सालमा संविधानसभा तुहाउने गलत सम्झौता गरेपछि कांग्रेसको अबसान सुरु भएको दाहालले दाबी गरे।
२०४६ सालपछि नेपाली जनताले एमालेलाई विश्वास गरे पनि त्यो विश्वास, जनताको परिवर्तनको चाहना एमालेले पूरा गर्न नसकेको दाहालको भनाइ छ। ‘एमालेले जनताको आशा र विश्वास त बचाउन सकेन, सकेन,’ अध्यक्ष दाहालले भने, ‘आफ्नै नेतालाई पनि बचाउन सकेन र सबैभन्दा अबसरबादी पार्टीको रुपमा पतन भयो ।’ तराई, पहाड र हिमालका जनताले एकपटक फेरि एमाओबादीलाई बहुमत दिएर हेर्ने तयारी गरेको दाहालको दावी छ। हेटौंडा महाधिबेशनबाट पार्टीभित्र गुट, उपगुट अन्त्य भएको उनले बताए ।
बाबुराम हेलिकप्टरबाट गोरखा आए
एकीकृत माओबादीका नेता तथा पूर्वप्रधानमन्त्री डा. बाबुराम भट्टराई निर्वाचन आचारसंहिता विपरीत, निर्वाचन आयोगको अनुमति बेगर हेलिकप्टरबाट गोरखा आएका छन्। निर्वाचन क्षेत्र नं. १ का प्रत्यक्षतर्फका उम्मेदवार भट्टराई गोरखाको ठूलो आँगन र आरुघाट बजारमा हुने चुनाबी सभा सम्बोधन गर्न मुगुबाट शुक्रबार हेलिकप्टरमा आएका हुन्। गोरखाको हरमटारीस्थित खेलकूद मैदानमा भट्टराई फिस्टेल एयरको हेलिकप्टरबाट ओर्लिए।
भट्टराईले पत्रकारसंगको संक्षिप्त भेटघाटमा मुगु, हुम्ला, बाजुरा, दैलेख जान निर्वाचन आयोगबाट अनुमति लिएको र त्यही क्रममाः गोरखा हेलिकप्टरबाट आएको बताए । ‘काठमान्डौंबाट उडेको हो । अहिलेसम्म काठमान्डौं पुगेको छैन’ भट्टराईले भने, ‘म प्यारासुटबाट खसेको भएपनि हुन्थ्यो । तर, यहाँसम्म हेलिकप्टरमै आएँ ।’ निर्वाचन आचारसंहिता अनजानबश उलंघन हुने गरेको भट्टराईको भनाइ छ । ‘सबै बुँदाहरु पढिएन’ उनले भने, ‘कहिकतै जादा, केही गर्दा आचारसंहिता उलंघन हुदो रहेछ । यो अनजानबश भएको हो । म बिधिको शासन मान्ने मान्छे हुँ । त्यसैले म यसबारे प्रस्टीकरण दिन तयार छु।’ लोकतान्त्रिक संस्कार दलहरुमा बसिनसकेकाले चुनाव प्रचारप्रसारको क्रममाः झडप हुने गरेको भट्टराईको भनाइ छ। निर्वाचन भाँड्न नेकपा–माओबादी लागेको भन्दै भट्टराईले ३३ दलिय मोर्चा देशमा नरहेको बताए । ‘खै कहाँ छन् ३३ दल ? ३३ दलको हल्ला फैलाएर हुन्छ’ भट्टराईले भने, ‘नेकपा–माओबादी मात्रै संबिधानसभाको बिपक्षी हो । अरु दल होइनन् । भएको भए खै कस्ता छन् उनीहरुको अनुहार, चेहरा ?’ निर्वाध रुपमा सबै दलले चुनाबप्रचार प्रसार गर्न पाउनुपर्ने भन्दै भट्टराईले अबरोध गर्नु उपर्युक्त नहुने बताए ।
गोरखाको हरमटारीस्थित खेलकूद मैदानमा फिस्टेल एयरको हेलिकोप्टरबाट झर्दै एमाओबादी नेता तथा पूर्व प्रधानमन्त्री डा. बाबुराम भट्टराई कडा सुरक्षाकाबीच । तस्बिर: प्रशन्न पोखरेल/गोरखा
