नेपाली कांग्रेसका केन्द्रीय सदस्य एवं सांसद् चन्द्र भण्डारीले प्रधानमन्त्री के.पी शर्मा ओलीबाट सबैले पाठ सिक्नुपर्ने बताएका छन्। प्रधानमन्त्री ओलीले राष्ट्रियता र स्वभिमानमा देखाएको व्यवहार साच्चीकै अनुकरणीय भएको भन्दै भण्डारीले अब बन्ने सरकारले ओलीबाट पाठ सिक्नुपर्ने बताए।
शनिबार गुल्मी सम्पर्क समाज रुपन्देहीको पाँचौ अधिवेशनलाई रुपन्देहीमा सम्बोधन गर्दै सांसद् भण्डारीले विपी कोइराला र मदन भण्डारीपछि अब प्रधानमन्त्री ओलीबाट पाठ सिक्नुपर्ने बताए।
गुल्मी क्षेत्र नं. २ का सांसद् समेत रहेका भण्डारीले गुटका कारण एमाले भित्रैबाट आलोचना गरे पनि प्रधानमन्त्री ओलीले आफूलाई सफल प्रधानमन्त्रीको रुपमा उभ्याएको दाबी गरे।
नेता भण्डारीले नयां सरकार गठनका लागि मिलेर जानुपर्ने भन्दै सहमति बाहेक अन्य कुनै विकल्प नभएको बताए। राजनीति अस्थिरताका कारण देशमा आर्थिक विकास हुन नसकेको भन्दै नेता भण्डारीले राजनीतिक नेता मात्र नभई ९० प्रतिशत व्यक्तिहरु भ्रष्ट हुँदा देशमा आर्थिक परिवर्तन हुन नसकेको बताए।
नेताहरु प्रजातन्त्रबादी भएपनि राष्ट्रबादी बन्न नसकेको उनको भनाई थियो। नेता भण्डारीले पढेलेखेका युवाहरु विदेश पलायन हुने र नपढेकोहरु राजनीतिमा आउँदा राजनीतिक स्थिरता नरहेको बताए।
नेपालको पाठ्यक्रमबाट नै विद्यार्थीहरुलाई राजनीतिक चेतनाको विकास गर्दै लैजानुपर्ने भन्दै नेता भण्डारीले अब नेपाली युवाहरु बाहिर जाने नभई अरुलाई नेपालसम्म ल्याउने बातावरण सरकारले मिलाउनुपर्ने बताए।
फरक प्रसंगमा उनले गुल्मीमा अहिले खानेपानी र सडकलाई प्राथमिकता दिएर काम भइरहेको बताए। अबको दुई बर्ष भित्रमा सिद्धबाबा क्षेत्र बाहेक बुटवल तम्घास सडकमा डेढ घण्टामै पुग्न सक्ने गरी सडक विस्तारको कार्य भइरहेको र आउने बर्ष सम्म सिमिचौरमा हवाईजहास बसाल्ने गरी काम थालनी भएको दावी गरे।