महिला प्रहरी कुटेको आरोपमा मधेसी जनअधिकार फोरम नेपालकी नेतृ, पूर्वशिक्षामन्त्री एवम् उम्मेदवार रेणुकुमारी यादवलाई सप्तरी प्रहरीले पक्राउ गरेको छ। बिहीबार करिब साढे १० बजे वडा प्रहरी कार्यालय राजविराजका दुई जना महिला प्रहरी कुटपिट गरेपछि उनलाई पक्राउ गरिएको अञ्चल प्रहरी कार्यालय सगरमाथाले जनाएको छ।
राजविराज वडाले थापेको चेकपोष्टले तीन जना युवा चढेको मोटरसाइकल पक्रेपछि यादव छुटाउन प्रहरी कार्यालय पुगेर 'कार्यकर्ता समातेको भन्दै' महिला प्रहरी जवान सिर्जना राई र विनिता राईलाई यादवले कुटपिट गरेकी थिइन्। महिला प्रहरी कुटेपछि यादवलाई जिल्ला प्रहरी कार्यालयले समातेको हो।
यादव फोरम नेपालबाट संविधानसभा निर्वाचन क्षेत्र नं. ४ की प्रत्यक्ष उम्मेदवार हुन्। उनलाई पक्राउ गरेपछि समर्थकले जिल्ला प्रहरी कार्यालय सप्तरीमा ढुंगामुढा गरेका छन्। प्रदर्शनकारीले हानेको ढुंगा लागेर पाँच जना प्रहरी घाइते छन्। स्थिति नियन्त्रण लिन एक राउन्ड अश्रुग्यास प्रहार गरे पनि सप्तरी प्रहरी कार्यालय तनावग्रस्त रहेको अञ्चल प्रहरी स्रोतले सेतोपाटीलाई जानकारी दिएको छ।
सप्तरी प्रहरीले घटनाको औपचारिक जानकारी दिन मानेको छैन। प्रहरी उपरीक्षक दिनेश अमात्यले यादव पक्राउ पर्दै नपरेको जिकीर गरे। 'स्थिति सामान्य छ केही भएकै छैन,' सेतोपाटीसँग अमात्यले भने, 'पक्राउ गरेको हुँदै हैन।' पूर्वक्षेत्रीय प्रहरी प्रमुख प्रहरी नायब महानिरीक्षक उपेन्द्रकान्त अर्यालले महिला प्रहरी कुटपिट घटनामा यादवलाई नियन्त्रणमा लिएको पुष्टि गरे। 'प्रहरी कार्यालयमा फोरम कार्यकर्ताले ढुंगामुढा गर्दा केही प्रहरी पनि घाइते छन्,' अर्यालले भने।
