‘घाँटीमा संक्रमण भएर’ ‘बोल्न नमिल्ने’ भन्दै व्यवस्थापिका संसदको सुशासन समिति छलेका अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्की शनिबार सार्वजनिक कार्यक्रममा देखापरेका छन्।
उनलाई छलफलका लागि सुशासन समितिले गत मंगलबार बोलाएको थियो। उनले ‘घाँटीमा संक्रमण’ भएर बोल्न नमिल्ने अवस्थामा आफू रहेको खबर समितिलाई पठाएका थिए। साथै, उनले एन्टिबायोटिक खाइरहेको र डाक्टरले सात दिन आराम गर्नु भनेकाले समितिले त्यसपछि बोलाए उपस्थित हुने जानकारी पठाएका थिए।
समितिमा उपस्थित नभएका लोकमान त्यसको चार दिनपछि शनिबार साढे पाँच बजे एभिन्युज टिभीको नवौं वार्षिकोत्सब कार्यक्रममा सहभागी हुन पुगेका हुन्। उनी एभिन्युज टिभीका अध्यक्ष भाष्करराज कर्णिकारसँग केहीबेर कुराकानी गरेर बाहिरिएका थिए।
कार्की बाहिरिएको केहीबेरपछि कार्यक्रमका प्रमुख अथितिको रुपमा प्रधानमन्त्री केपी ओली कार्यक्रममा पुगेका थिए। त्यहाँ अख्तियार प्रधानमन्त्रीलगायत अन्य राजनीतिक दलका नेता, उद्योगीलगायत उपस्थित थिए।
मंगलबार सुशासन समितिले काठमाडौं विश्वविद्यालयको परीक्षामा हस्तक्षेप गरेको विषयमा छलफल गर्न बोलाएको थियो। उनले उपस्थित हुन नसक्ने भन्दै समितिलाई पठाएको चिठी पढेर सुनाइएको थियो।
सुशासन समितिमा लोकमानलगायत अख्तियारका सबै पदाधिकारीलाई बोलाइएको थियो। तर, समितिमा कोही पनि गएनन्, कर्मचारीमात्र गएका थिए। समितिमा नगएको विषयमा भने सोधीखोजी गरिएको थिएन।
