अन्तरिम मन्त्रीपरिषद्का पूर्वअध्यक्ष खिलराज रेग्मीले सरकारको काँध फेर्नेभन्दा पनि संविधानको सफल कार्यान्वयनमा एक ढिक्का बन्न दलहरुलाई सुझाव दिएका छन्।
दोश्रो संविधानसभाको निर्वाचन गरी तात्कालिन राजनीतिक अन्यौल हटाउने मुख्य जिम्मेवारी निर्वाह गर्ने श्रेय पाउँदै आएका रेग्मीले संविधानको सफल कार्यान्वयनमा सहमति जुटाउन दलहरुलाई आग्रह गरे। गाउँ सेवा परिवार बिर्घा स्याङ्गजाको २० आंै साधारणसभालाई शनिबार राजधानीमा सम्बोधन गर्दै मन्त्रिपरिषदका पूर्वअध्यक्ष रेग्मीले अझै पनि दलहरुबीच मूलभुत विषयमा राजनीतिक समझदारी र सहकार्यको खाँचो रहेको औंल्याए।
हृदयमा इमान्दारी र मस्तिष्कमा समझदारी गरेर काम गर्ने हो भने सत्ताको काँध फेर्नुपर्ने अवस्था नआउने दाबी गर्दै उनले मूलभुत विषयमा राजनीतिक सहमतिका साथ जिम्मेवारी निर्वाह गर्न दलहरुलाई आग्रह गरे।
संविधानले तोके अनुसारका संवैधानिक निकायको गठन, तीन तहको निर्वाचन लगायतका लागि अब अत्यन्तै कम समय भएको भन्दै उनले संविधान कार्यान्वयनका लागि युद्धस्तरमा काम गर्न पनि दलहरुलाई आग्रह गरे।
२०६४ सालमा निर्वाचित संविधान सभाले संविधान बनाउन नसकेपछि नयाँ संविधान सभाको निर्वाचन गर्ने जिम्मेवारीका साथ राजनीतिक दलहरूको सहमतिमा रेग्मी २०६९ मा अन्तरिम चुनावी मन्त्रीपरिषद्को अध्यक्ष भएका थिए। उनकै नेतृत्वमा दोश्रो संविधानसभाको निर्वाचन भएको थियो ।
