संसदीय समितिमा आफूमाथि उठाइएका प्रश्नको जवाफ दिन पुगेकी सर्वोच्च अदालतकी प्रस्तावित न्यायाधीश सपना प्रधान मल्लले सांसद्हरुलाई नै प्रश्नको वर्षा गरेका छन्।
प्रस्तावित न्यायाधीश मल्लले संसदीय सुनुवाई विशेष समितिको बिहिबारको बैठकमा विगतमा एउटा पार्टीको झण्डामुनि बसेको व्यक्तिले कसरी निष्पक्ष न्याय दिन सक्छ भनेर प्रश्न गरेपछि सांसद्हरुलाई उल्टै प्रश्न गरेका थिए। सुनुवाइको अन्तिम क्रममा रहेकी प्रस्तावित न्यायाधीश मल्ललाई डा. प्रकाशशरण महत, आनन्दप्रसाद ढुंगाना, बालकृष्ण खाण लगायतका काँग्रेसका सांसद्हरुले विगतमा नेकपा एमालेको सभासद्को रुपमा काम गरेको पृष्ठभूमि रहेको अवस्थामा तपाईंले भोलि राजनीतिक अभिष्ट पूरा हुने गरी संविधानको व्याख्या गर्नु हुँदैन भन्ने आधार के ? दलको झण्डामुनि बसेको विगतबाट भविष्यमा तपाईँबाट निष्पक्ष न्याय हुन्छ भनेर कसरी विश्वास गर्ने ? लगायतका प्रश्न गरे।
नेकपा एमालेकी सांसद् अष्टलक्ष्मी शाक्यले समेत प्रस्तावित न्यायाधीश मल्लको निष्पक्षतालाई लिएर प्रश्न गरिन्।
खासगरी पहिलो संविभानसभामा एमालेको तर्फबाट सभासद् भएको सन्दर्भलाई जोडेर सांसद्हरुले प्रश्नको वर्षा गरेकामा प्रस्तावित न्यायाधीश मल्ललाई चित्त बुझेको रहेनछ । त्यसैले जवाफ दिने क्रममा उनले सांसद्हरुलाई नै उल्टै प्रश्न गरिन्। उनले के राजनीति गर्ने मान्छेमा स्वतन्त्र चिन्तन हुँदैन ? के एक पटक सभासद् भएका आधारमा म अब जीवनभरका लागि अयोग्य भएँ? के मसँग भएको क्षमता अब कहिल्यै काम नलाग्ने भयो? लगायतका प्रश्न गरिन्।
प्रस्तावित न्यायाधीश मल्लले पहिलो संविधानसभामा एमालेले सभासद् बनाएपनि त्यसअघि आफू उक्त पार्टीको साधारण सदस्य समेत नरहेको दाबी गरिन्। उनले विज्ञतालाई कदर गरेर सभासद्को प्रस्ताव गरेका कारण आफूले स्वीकार गरेको भन्दै आफू संविधानसभामा एमाले पार्टीको लोगो लगाएर नगएको बताइन्। जवाफका क्रममा प्रस्तावित न्यायाधीश मल्लले संविधान र कानूनमा कहिँ पनि राजनीति गरेको व्यक्ति न्यायाधीश हुन नपाउने भनेर उल्लेख नगरिएको सांसद्हरुलाई सम्झाइन्।