एकिकृत नेकपा माओवादीका अध्यक्ष पुष्पकमल दाहाल 'प्रचण्ड'ले आफूबाट टुक्रिएको वैद्य नेतृत्वको माओवादीलाई 'इतिहासका खलनायक' भएको बताएका छन्। चुनावी सभालाई सम्बोधन गर्न चरिकोट आईपुगेका प्रचण्डले सभामा सम्वोधन गर्दै भने “एकिकृत माओवादीविरुद्ध छिटपुट घटना घटाउनेहरू इतिहासका खलनायक हुन्।”
दिउँसो साँढे १ वजे फिस्टेल एयरको नाईन एन ए के ए हेलिकोप्टरबाट सदरमुकाम चरिकोटको टुँडिखेलमा छोरा प्रकाशसहित उत्रिएका प्रचण्डले ६ महिनामा संविधानको मस्यौदा तयार गरी १ वर्षमा जसरी भए पनि संविधान जारी गर्ने दाबी गरे।
कार्यक्रममा एमालेलाई गएगुज्रेको र लिङ नभएको आरोप लगाउँदै उनले सबै क्षेत्रमा पार्टीको लोकप्रियता बढ्दै गएको दाबी गरे। २०६४ को चुनावमा एकीकृत माओवादी मधेसमा कमजोर रहेपनि अहिले मजवुत भएका कारण आफूले मधेसबाट उम्मेदवारी दिएको उल्लेख गरे।
प्रचण्डको चुनावी सभालाई अवरोध गर्नका लागि नेकपा–माओवादीले आज दोलखालगायत ४ जिल्लामा बन्दको घोषणा गरेको थियो। आज बिहान पार्टीले जिल्लाको खावा तामाकोसी र चरङेमा रुख ढालेर अवरोध गरेको थियो भने चरङेमा राखिएको बोत्तल वम नेपाली सेनाले निश्त्रि्कय पारेको थियो। सडकमा ढालिएका रुखहरु प्रहरीले हटाएको थियो। जिल्लामा हुनसक्ने सुरक्षा चुनौतिलाई लिएर प्रहरीले हिजैदेखि सुरक्षा व्यवस्था कडा बनाएको थियो।
रूख ढालेर बाटो अवरोध गर्ने बाहेक अन्य कुनै पनि अवरोध नभएको जिल्ला प्रहरी कार्यालय दोलखाका प्रहरी नायब उपरिक्षक सुरेश काफ्लेले जानकारी दिए। प्रचण्ड चुनावी सभालाई सम्वोधन गरेर काठमाण्डौ फर्किएका छन्।