नेपाली कांग्रेसका सभापति शेरबहादुर देउवाले आइतबार संसदमा सम्बोधन गर्दै ओली सरकारले अघि बढाएका सबै अन्तर्राष्ट्रिय सन्धि–सम्झौता लागू गर्ने प्रतिबद्धता व्यक्त गरेका छन्।
‘यहाँ अनेक अड्कलबाजी र हल्ला छन्, तर म विश्वास दिलाउन चाहन्छु, ओली सरकारले गरेका सबै अन्तर्राष्ट्रिय सन्धि–सम्झौता अब आउने सरकारले पूराका पूरा लागू गर्नेछ,’ संसदमा प्रधानमन्त्री केपी ओलीभन्दा ठिकअगाडि बोलेका देउवाले भने, ‘मेरा मित्र केपी ओलीले गरेका सबै सम्झौताहरू अघि बढ्नेछन्।’
कांग्रेस र माओवादीद्वारा सरकारविरुद्ध प्रस्तुत अविश्वास प्रस्तावमाथि छलफल क्रममा अन्तिम वक्ताका रूपमा बोल्दै देउवाले उक्त प्रतिबद्धता व्यक्त गरेका हुन्।
ओली सरकार विस्थापित भएर नेपाली कांग्रेस र माओवादी–केन्द्रको गठवन्धन सरकार बनेपछि केपी ओलीले चीनसँग गरेका ‘ऐतिहासिक’ सन्धि–सम्झौता अगाडि बढ्छन् कि बढ्दैनन् भन्नेमा धेरैले शंका व्यक्त गरेका थिए। कतिले त चीनसँग भएका सन्धि–सम्झौता तुहाउनकै लागि ओली सरकार विस्थापित गरिएको आरोप लगाउँदै आएका छन्।
हालै भारतद्वारा लगाइएको नाकाबन्दीको पृष्ठभूमिमा ओली सरकारले चीनसँग पारवहन सन्धि, नेपाल–चीन जोड्ने रेलमार्ग र ट्रान्समिसन लाइन निर्माण गर्ने प्रारम्भिक सम्झौता गरेको थियो। त्यस्तै, चीनबाट पेट्रोलियम पदार्थ आयात गर्न समझदारीपत्रसमेत हस्ताक्षर भएको थियो।
भारतसँगको लामो व्यापारिक तथा पारवहन निर्भरता अन्त्य गर्न चीनसँग भएका यी सन्धि–सम्झौतालाई महत्वपूर्ण उपलब्धिका रूपमा लिइन्छ। यसको प्रभावकारी कार्यान्वयनले भारतसँगको निर्भरता कम गर्नुका साथै नेपालको राजनीतिक स्वतन्त्रतालाई अगाडि बढाउन मद्दत गर्ने ‘कोसेढुंगा’ मानिन्छ।