सत्तारुढ दल फोरम लोकतान्त्रिक केपी शर्मा ओली नेतृत्वको सरकारबाट बाहिरिएको छ। लोकतान्त्रिक फोरमको शनिबार बसेको बैठकले सरकारबाट बाहिरिने निर्णय गरेको हो।
लोकतान्त्रिक फोरमबाट स्वास्थ्य मन्त्री रामजनम चौधरीले पार्टीले ओली सरकारलाई दिएको समर्थन फिर्ता लिएको जानकारी दिए।
‘संसदमा प्रधानमन्त्रीविरूद्ध कांग्रेस, माओवादी केन्द्रलगायतका बहुमत सांसद अविश्वासको पक्षमा रहेको अवस्थामा सरकार अल्पमतमा परिसकेको छ, लोकतान्त्रिक शासन प्रणालीमा सरकार अल्पमतमा परिसकेपछि त्यसमा बसिरहन औचित्य नरहने ठहर गर्दै हामी सरकारबाट बाहिरिएका हौं,’ उनले भने, ‘हाम्रो पार्टी कार्यालयमा बसेको बैठकले यही निर्णय गरेको छ।’
उक्त जानकारी दिन पार्टी अध्यक्ष विजयकुमार गच्छदार ओलीकहाँ जाँदैछन्। लोकतान्त्रिक फोरमबाट ओली सरकारमा तीन जना मन्त्री थिए।
उता, राष्ट्रिय प्रजातन्त्र पार्टी पनि सरकारबाट बाहिरिएको छ।
केन्द्रीय कार्यालय चावहिलमा बसेको बैठकले सरकारलाई दिएको समर्थन फिर्ता लिने निर्णय गरेको हो। बैठकपछि राप्रपाले विज्ञप्ति जारी गरी उक्त जानकारी दिएको छ।
साथै बैठकले संसदमा प्रधानमन्त्री ओलीविरूद्ध परेको अविश्वास प्रस्तावमा मतदान गर्ने निर्णय गरेको प्रवक्ता किरण गिरीले जानकारी दिए।
