नेपाली कांग्रेसका सभापति शेरबहादुर देउवाले अधिकार प्राप्तिका लागि आन्दोलन गर्ने हक जोकोहीलाई पनि रहेको भन्दै मधेशवादी दलमाथि बिखण्डनवादीको आरोप लगाउने अधिकार कसैलाई पनि नरहेको बताएका छन्।
दशरथ चन्द स्मृति प्रतिष्ठानले दशरथ चन्दको १ सय १४ औं स्मृतिका अवसरमा शुक्रबार काठमाडौमा गरेको कार्यक्रममा काँग्रेस सभापति देउवाले अहिलेका प्रमुख राजनीतिक दलहरु सबै आन्दोलनकै बलबाट स्थापित भएको भन्दै आन्दोलन गरेकै आधारमा मधेशवादी दलमाथि विखण्डनवादीको बिल्ला भिराउन नहुने बताए।
प्रधानमन्त्री केपी शर्मा ओलीले मधेशका जिल्ला मात्र रहने गरी दुई प्रदेश बनाइनुपर्ने माग राखेर आन्दोलन गर्दै आएका मधेशवादी दललाई विखण्डनवादीको आरोप लगाउँदै आएका छन्। कांग्रेस सभापति देउवाले भने मधेशवादी दललाई विखण्डनवादीको आरोप लगाएर मुलुकको राष्ट्रिय एकता बलियो हुन नसक्ने बताए। उनले हिमाल, पहाड र तराई तिनै क्षेत्रका जनताको एकता र सहकार्यमा मात्र राष्ट्रियता मजबुत हुने बताए।
कांग्रेस सभापति देउवाले मधेशवादी दलहरुले राखेका माग संविधान संशोधन गरेर पूरा गर्न सकिने बताए। उनले संशोधनका विषयमा संविधान लचिलो रहेकाले सरकारले मधेशवादी दलका माग सम्बोधनका लागि अग्रसरता लिनुपर्ने बताए। उनले संविधान कार्यान्वयन गर्नका लागि सबै राजनीतिक दलको प्रतिज्ञा चाहिने तर मधेशवादी दलले आन्दोलन गरेको अवस्थामा भने चाहेर पनि संविधानको कार्यान्वयन हुन नसक्ने बताए।
