व्यवस्थापिका–संसद्को आजको बैठकको शून्य समयमा सांसदहरुले राष्ट्रिय तथा स्थानीय समस्या समाधान गर्न सरकारको ध्यानाकर्षण गराएका छन्।
उनीहरूले कर्णाली अञ्चलका विभिन्न जिल्लामा लामो खडेरीका कारण खाद्य पदार्थको अभाव रहेको र त्यसमा पनि हुम्ला बढी प्रभावित रहेको भन्दै तत्काल खाद्यान्न उपलब्ध गराउन आग्रह गरे।
बाढी पहिरोका कारण मुलुकका विभिन्न जिल्ला प्रभावित भएको, भूकम्पपीडित जनता अझै पनि खुला आकासमुनि बस्न बाध्य भएपनि सरकारले त्यसतर्फ ध्यान दिन नसकेकामा गुनासो गरे। यसरी धारणा राख्ने सांसदहरुमा कृष्णप्रसाद पौडेल, गणेशसिंह ठगुन्ना, जीवनबहादुर शाही, तुलसा रानालगायत थिए।
यसअघि सङ्घीय सद्भावना पार्टीका सांसद डिम्पलकुमारी झाले संविधान लेखन प्रक्रियामा नै असन्तुष्टी व्यक्त गर्दै लामो समयदेखि आन्दोलन गर्दै आएका मधेसवादी दलको माग सम्बोधन गर्नेतर्फ सरकारले ध्यान नदिएकामा असन्तुस्टि व्यक्त गरेकी थिइन्।
उनको सो धारणा लगत्तै मधेसवादी र आदिवासी जनजाति सम्बद्ध दलका सांसदहरुले बैठक बहिष्कार गरेका थिए।
