प्रतिपक्षी दल नेपाली कांग्रेसले भूकम्प पीडितका लागि तत्काल २ लाख रुपैया अनुदान दिन माग गर्दै आइतबारको संसद बैठक तेस्रो पटक अबरोध गरेको छ।
सभामुखले आधा घण्टाका लागि स्थगित गरेको बैठक झण्डै एकघण्टापछि शुरु गरेपछि विपक्षी दलका सांसदहरु उभिएर विरोध गरेका थिए।
त्यसपछि सभामुख ओनसरी घर्तिमगरले कांग्रेसका अर्जुनप्रसाद जोशीलाई बोल्न समय दिइन्।
सदनमा बोल्दै जोशीले भूकम्प पीडितको माग सम्बोधन गर्न तीन दिनदेखि सदन अबरोध हुँदा पनि सरकारले प्रतिपक्ष दलसँग सामान्य छलफल पनि गर्न तयार नभएको भन्दै सदन चल्न नदिने बताए। ‘के यसरी नै सदन चल्छ? भूकम्पपीडितका लागि खाजा बाड्ने भन्ने कुरा पनि आएको छ। के यो कांग्रेसको मात्रै कुरा हो? यो ६ लाख भन्दा बढी पीडित परिवारको समस्या हो,’ उनले भने।
अहिलेसम्म ११ जिल्ला बाहेक बाँकी २० जिल्लामा प्रमाणीकरण हुन नसकको भन्दै उनले उनीहरुको प्रमाणीकरण कहिले हुन्छ? भनि प्रश्न गरेका थिए। ‘११ जिल्लामा भएको प्रमाणीकरण कार्यमा पनि राजनीतिक आस्थाका आधारमा सक्कली पीडितलाई छुटाएर नक्कलीलाई दिने काम भएको छ,’ उनले भने।
‘अहिलेसम्म ५ हजारलाई अनुदान सम्झौता भएको छ भने बाँकीले कहिले सम्म पाउने हो? १४ महिनासम्म वितरण नभएपछि अब एकैचोटी २ लाख अनुदान दिनुपर्छ। अहिले प्राधिकरणले अनुगमनका लागि इन्जिनियर खटाए पनि पीडितको आवास बनेकै छैन भने उनीहरुको काम के?,’ उनले आक्रोश पोखे।
लगत संकलन गर्ने कार्य पनि सबै पीडितको समान हो भन्ने महसुस गरी सबैको लगत संकलन गरी तत्काल २ लाख दिने काम नभए सदन चल्न नसक्ने उनले दाबी गरे।
त्यसपछि कांग्रेसका सांसद उभिएर विरोध गरे।
सभामुखले तीन दिनदेखि सदन चल्न नसकेकाले जनताले यो सदनबाट आशा गरेको भन्दै यो सदनको प्रक्रियाबाहेक अरू विकल्प हुन नसक्ने बताइन्। उनले भनिन्, ‘सदनमा उठेका विषयमा सदनले गरेको निर्देशन अनुसार प्रधानमन्त्री बोल्न तयार हुनुभएको छ यी सबै विषयमा आफ्ना भनाइ राख्ने जानकारी आएको छ। त्यसैले प्रधानमन्त्रीलाई बोल्न दिएर उहाँले बोलेपछि आउन सक्ने विमति सदनमा मर्न दिने छैनौ,’ भन्दै सदन सुचारु हुन दिन आग्रह गरिन्।
तर, कांग्रेसका सांसद उभिइरहेपछि सभामुखले सोमबार दिउसो १ बजेसम्मका लागि बैठक स्थगित गरिन्।
