नेपाली कांग्रेसका सभापति शेरबहादुर देउवाले संविधानले कुनै पनि जातजाति र वर्गमाथि विभेद नगरेको भन्दै संविधानमा लेखेका कुरा कार्यान्वयनका लागि सबै राजनीतिक दलहरू एकजुट हुनुपर्ने बताएका छन्।
जोशी रिसर्च इन्ष्टिच्युटले शनिबार ललितपुरमा गरेको कार्यक्रममा कांग्रेसका सभापति देउवाले संविधानले आरक्षणको व्यवस्था गर्नेदेखि समानुपातिक र समावेशी प्रतिनिधित्वको सुनिश्चित गरेको भन्दै लेखेका कुरालाई व्यवहारमा उतार्न सबै एकजुट हुनुपर्ने बताए। उनले अबको डेढ वर्षभित्र तीन तहको निर्वाचन गर्नुपर्ने अवस्था रहेकाले दलहरूबीच एकता र सहमति आवश्यक रहेको बताए। उनले संविधानमा रहेका कमजोरी संशोधनमार्फत सुधार गर्न सकिने पनि बताए।
देउवाले संविधान कार्यान्वयनमा आएपछि अहिले विद्यमान धेरै विकृति अन्त्य हुने र मुलुक आर्थिक विकासको बाटोमा अगाडि बढ्ने बताए। कार्यक्रममा चार जना प्राध्यापकहरूलाई सम्मान गरिएको थियो।