सत्ता साझेदार नेकपा माओवादी केन्द्रका नेता देव गुरुङले द्वन्द्वकालीन मुद्दालाई सत्य निरुपण तथा मेलमिलाप आयोगको दायरामा नल्याइएको अवस्थामा आफूहरूले फेरि युद्ध गर्ने चेतावनी दिएका छन्।
पटक–पटक ध्यानाकर्षण गराउँदा पनि द्वन्द्वकालीन मुद्दालाई सत्य निरुपण तथा मेलमिलाप आयोगको दायरामा नल्याइएको भन्दै यस विषयलाई बेवास्ता गरिए आफूहरूले फेरि युद्वको बाटो रोज्ने बताए। रिपोर्टस् क्लबले शनिबार काठमाडौंमा गरेको साक्षात्कारमा माओवादी केन्द्रका नेता गुरुङले राजनीतिक निर्णयबाट हल गरिनुपर्ने विषयलाई कानुनी प्रक्रियामा लगे माओवादी नेताहरूसामु जेल जाने र युद्ध गर्नेमध्ये एउटा विकल्प रोज्नुपर्ने अवस्था आउने र त्यसबेला दोस्रो विकल्प रोजेर जङ्गल जाने बताए।
सत्य निरुपण तथा मेलमिलाप आयोगले उजुरी आह्वान गरेर द्वन्द्वकालीन घटनाहरूको छानविन सुरू गरे पनि आफ्ना कतिपय नेता तथा कार्यकर्तामाथि द्वन्द्वकालीन घटनालाई लिएर अदालतमा मुद्दा चलिरहेको भन्दै माओवादी केन्द्रले असन्तुष्टि जनाउँदै आएको छ। अदालतमा विचाराधिन द्वन्द्वकालीन सबै मुद्दा आयोगको दायरामा ल्याउने विषयमा प्रमुख सत्तारुढ नेकपा एमाले र माओवादी केन्द्रबीच गत वैशाखको तेस्रो साता भएको सहमति कार्यन्वयनमा आएको छैन।