व्यवस्थापिका संसद्को बैठक बस्दै नबसी स्थगित भएको छ।
शुक्रबार बिहान ११ बजे बोलाइएको संसद्को बैठक सरकार र प्रमुख प्रतिपक्षी नेपाली काँग्रेसबीच कुरा मिल्न नसकेपछि बस्दै नबसी स्थगित भएको हो।
प्रमुख प्रतिपक्षी नेपाली काँग्रेसले राखेको भुकम्प प्रभावितहरुलाई एकमुष्ट दुई लाख रुपैयाँ अनुदान रकम दिइनुपर्ने मागका सम्बन्धमा प्रधानमन्त्री केपी शर्मा ओलीले शुक्रबार विहान संसद् भवनमा काँग्रेसका सपभापति शेरबहादुर देउवा लगायतका नेतासँग बैठक राखेका थिए। तर बैठक सौहाद्रपूर्ण हुन सकेन । प्रधानमन्त्री ओलीले भूकम्प प्रभावितहरुलाई अनुदान दिने कुरा खाजा बाँडेजस्तो नभएको बताएपछि बैठकको माहोल विग्रिएको काँग्रेस नेता डा. प्रकाशशरण महतले संचारकर्मीहरुलाई जानकारी दिए।
प्रधानमन्त्री ओलीले पुनर्निमाणको कामको विषयमा आफूले संसद् बैठकमा सम्बोधन गर्ने बताएपनि काँग्रेसले मानेन् । काँग्रेसले आफूले प्रधानमन्त्रीको भाषण सुन्नका लागि नभइ भुकम्प प्रभावितहरुलाई घर बनाउन एकमुष्ट दुई लाख रुपैयाँ दिने प्रतिबद्धताका लागि संसद् बैठक अवरुद्ध गरेको भन्दै प्रधानमन्त्रीबाट त्यो प्रतिबद्धता नआएसम्म बैठक चल्न नदिने अडान लियो।
कांग्रेसको त्यही अडान र तत्काल २ लाख रुपैयाँ दिन नसकिने प्रधानमन्त्रीको भनाइमा सहमति नजुटेपछि सभामुख ओनसरी घर्तीले सूचना टाँस गरेर संसद् बैठक असार १२ गतेसम्मका लागि स्थगित गरिन्।
काँग्रेससँगको बैठकपछि प्रधानमन्त्री केपी शर्मा ओली संचारकर्मीहरुलाई कुनै प्रतिक्रिया नदिइ वाहिरिए। सरकारका तर्फबाट कानूनमन्त्री अग्नीप्रसाद खरेलले भूकम्प प्रभावितहरुलाई किस्ताबन्दीमा अनुदान दिने निर्णय काँग्रेस नेतृत्वको अघिल्लो सरकारले नै गरेको भन्दै काँग्रेसले अहिले आएर एकमुष्ट अनुदान चाहियो भन्दै संसद् चल्न नदिनु गैरजिम्मेवारीको पराकाष्ठ भएको बताए।
भूकम्प प्रभावितहरुलाई तीन किस्तामा अनुदान रकम दिने कार्यविधि अघिल्लो सरकारले नै बनाएको हो । तर भुकम्प गएको १४ महिना भइसक्दा पनि सरकारले करिब ६ लाख प्रभावितमध्ये ५ हजारलाई पनि पहिलो किस्ताको अनुदान दिएको छैन ।