पूर्वराष्ट्रपति डा. रामवरण यादवले संस्कृत भाषा पूर्वीय सभ्यताको जननी भएको वताएका छन्।
दाङको विजौरीस्थित नेपाल संस्कृत विश्वविद्यालयमा आयोजित कार्यक्रमलाई सोमवार विहान सम्वोधन गर्दै गणतान्त्रिक नेपालका प्रथम राष्ट्रपति यादवले संस्कृत भाषा र जन्म दिने आमालाई समान रुपमा अर्थाए।
उनले भने,‘जसरी आमाले हामीलाई यो धर्तीमा पहिलो पाइला टेकाउँछिन्। ठीक त्यसैगरी संस्कृत भाषाले पनि हामीलाई सभ्यताको पहिलो पाइला टेकाउन र सिकाउन मद्दत गर्छ।’
संस्कृत भाषाले टेक्निकल विषय जस्तो तत्कालै आउटपुट नदिने भएपनि यसको प्रभाव जुगजुग सम्म रहने उनको धारणा थियो। अमेरिका, वेलायत, भारत लगायत विश्व मानव जगले आज आएर संस्कृत भाषालाई सोच, खोज र अनुसन्धानको विषय बनाउनुले यसको महत्व स्पष्ट हुने बताएका डा. यादवले संस्कृत र संस्कृति संरक्षणका लागि सबै समुदाय लाग्नुपर्ने बताए।
उनले भने,‘पश्चिमा देशहरु संस्कृति संरक्षणमा लागि परेका छन् हाम्रा असल कुराहरु ग्रहण गरिहेका छन्। तर हाम्रो न त राज्य तह र नागरिक तहवाट त्यस्तो कुनै पहल भएको देखिदैन।’ उनले आफ्नो संस्कृति कसैको प्रभावमा परेर नत्याग्न आग्रह सेमत गरे। आफु प्रथम राष्ट्रपतिको हैसियले संस्कृत विश्वविद्यालय र संस्कृत भाषाको उत्थानको लागि पहल गर्ने उनले आश्वासन समेत दिएका थिए।
उनले राजनीतिक स्थायित्वपछि देश विकास र संस्कृति संरक्षण गर्न सहज हुने बताए।