प्रतिपक्षीदल नेपाली कांग्रेसको अवरोधका कारण व्यवस्थापिका संसदको सोमबारको बैठक अवरुद्ध बन्यो।
व्यवस्थापिका संसदको सोमबारको बैठकको सुरुमै प्रमुख प्रतिपक्षी नेपाली कांग्रेसका सांसदले बजेट चुहिएको भन्दै आपत्ती जनाएपछि बैठक अवरुद्ध बनेको हो। एकै दिन पटक पटक गरी चार पटक सम्म बैठक बसेपनि कांग्रेसको अवरोध जारी रहेपछि सोमबारको बैठक कार्यसुचीमा प्रवेश गर्न सकेन। संसदीय मूल्य मान्यता विपरीत सदनमा पेश गर्नु अगाडि नै सरकारले पेश गरेको वार्षिक बजेटको सूचना बाहिर चुहाएको भन्दै प्रमुख प्रतिपक्षी दल नेपाली कांग्रेसले संसद बैठक अबरोध गरेको हो।
सदनमा आउनु अगाडि नै पत्रपत्रिकामा बजेटको सम्पुर्ण विवरण आउनुले संसदको मर्यादामाथि प्रश्न चिन्ह खडा भएको भन्दै कांग्रेस स्पष्ट छानविनको माग गरेको छ। पूर्वअर्थमन्त्री समेत रहेका नेपाली कांग्रेसका सांसद रामशरण महतले अर्थमन्त्रीले सदनमा पेश गर्नुपहिले नै बजेट बाहिर ल्याएर सरकारले संसदको विशेषाधिकार माथि मानहानी गरेको भन्दै स्पष्ट छानबिनको माग गरे।
बजेट सार्वजनिक बारे छानविन र त्यसमा संलग्नलाई कारबाही नभएसम्म बैठकको कारवाही अघि नबढाउन प्रतिपक्षीले माग गरेपछि सभामुख ओनसरी घर्तीले पहिलो बैठक आधा घण्टाका लागि स्थगित गरेकी थिइन्। दोस्रो पटक बसेको बैठकमा नेपाली कांग्रेसका सांसद रमेश लेखकले अघिल्ला बर्षमा पनि बजेट चुहिएको र त्यसपछि गठन गरिएको छानविन समितिको प्रतिवेदनले र्निदिष्ट गरेका विषयको दृष्टान्त दिदै छानविन विना बैठक अघि बढ्न नसक्ने बताए।
तेस्रो पटक बसेको बैठकमा पुर्व अर्थमन्त्री समेत रहेका नेपाली कांग्रेसका सांसद महेश आचार्यले बजेट चुहिएको सत्यलाई स्वीकार्दै सरकारले छानविन समिति गठन नगरेसम्म कारवाही अघि बढ्न नदिने बताए।
एकै दिन चौथो पटक बसेको बैठकमा पनि नेपाली कांग्रेसले आफ्नो अडान कायमै राख्यो। नेपाली कांग्रेसका सचेतक ईश्वरी न्यौपाने माग पुरा नभएसम्म सदनको कारवाही अघि बढ्न नसक्ने बताइन्।
एकै दिन चार पटकको प्रयासमा पनि बैठक संचालन हुन नसकेपछि सभामुख ओनसरी घर्तीले मंगलबार बिहान ११ बजे सम्मका लागि बैठक स्थागित गरिन्।