काङ्ग्रेस सभापति शेरबहादुर देउवाले गम्भीर प्रकृतिले मानवअधिकार उल्लंघन भएका द्वन्द्वकालीन घटनामा कसैले पनि उन्मुक्ति नपाउने बताएका छन्।
एमनेष्टी इन्टरनेशनल नेपालले शुक्रबार काठमाडौंमा आयोजना गरेको अन्तरक्रिया कार्यक्रममा बोल्दै सभापति देउवाले नेपालले मानवअधिकार सम्बन्धि धेरै वटा सन्धि र महासन्धिमा हस्ताक्षर गरेको अवस्थामा गम्भीर प्रकारका मानवअधिकार उल्लंघनका द्वन्द्वकालीन घटनामा पीडकले उन्मुक्ति नपाउने बताएका हुन्।
उनले सत्तारुढ दल नेकपा एमाले र माओवादीबीचको नौ बुँदे सम्झौताले पीडकलाई कारबाहीबाट जोगाउन नसक्ने बताए। द्वन्द्वकालीन घटनाहरूको छानविनका लागि सत्य निरुपण तथा मेलमिलाप आयोगले काम गरिरहेको अवस्थामा यसबारेमा अहिले नै धेरै टिप्पणी जायज नहुने पनि देउवाले बताए।
अन्तरक्रियामा नेकपा एमालेका उपाध्यक्ष बामदेव गौतम मानवअधिकार कर्मीहरूमाथि आक्रामक रुपमा प्रस्तुत भए। उनले मानवअधिकारकर्मीहरू मेलमिलाप गराउने भन्दा पनि विदेशबाट डलर ल्याएर शान्ति भड्काउने षड्यन्त्रमा लागेको आरोप लगाए। माओवादीसँग नौ बुँदे सम्झौता गर्नमा आफ्नो मुख्य योगदान रहेको भन्दै मानवअधिकारकर्मीको विरोधका कारण नौ बुँदे सम्झौताको कार्यान्वयन नरोकिने बताए।
उनले मानवअधिकारकर्मीहरूमाथि शान्ति भड्काउन सत्य निरुपण तथा मेलमिलाप आयोग सम्बन्धि कानुनको गलत व्याख्या गरेको आरोप समेत लगाए। नेकपा (माओवादी केन्द्र)का उपाध्यक्ष नारायणकाजी श्रेष्ठले पनि सत्यनिरुपण तथा मेलमिलाप आयोगले काम गरिरहेको अवस्थामा द्वन्द्वकालीन घटनाहरू अदालतको क्षेत्राधिकारभित्र नपर्ने बताए।
उनले मानवअधिकारकर्मीहरूले शान्ति सम्झौताको भावनाविपरीत द्वन्द्वकालीन घटनालाई अनावश्यक रुपमा उचाल्न नहुने बताए। कार्यक्रममा मानवअधिकारकर्मी दमननाथ ढुंगानाले मधेसवादी र आदिवासी जनजाति सम्बद्ध दलहरूको आन्दोलनलाई कमजोर नआँक्न प्रमुख दलका नेताहरूसँग आग्रह गरे। उनले असन्तुष्ट दलका मागलाई वार्तामार्फत सम्बोधनका लागि गम्भीर हुन पनि आग्रह गरे।
