नेपाली कांग्रेसका सभापति तथा प्रमुख प्रतिपक्षी दलका नेता शेरबहादुर देउवाले प्रधानमन्त्री केपी शर्मा ओलीको हावादारी योजनामा बजेट दुरुपयोग हुनसक्ने भन्दै त्यसको प्रतिवाद गरिने चेतावनी दिएका छन्।
नेपाल प्रेस युनियनको २५ औँ स्थापना दिवसको काठमाडौंमा भएको कार्यक्रममा सभापति देउवाले पत्याउन र गर्न नसकिने काम गर्छु भन्दै हिँड्नेलाई जनताको कर र विदेशी दातृ निकायले दिएको सहयोग दुरुपयोग नगर्न भन्दै सरकारलाई चेतावनी दिएका हुन्।
सभापति देउवाले देशमा सजिलोसँग यातायात समेत नचलिरहेको बेला रेल कुदाउँछु भन्नु, बिजुली बेच्छु भन्नु हावादारी गफ भन्दै बजेटमा झुठा आश्वासन दिई बजेट दुरुपयोग गर्ने सम्भावना बढेकोले कांग्रेस कडा रुपमा प्रतिवादमा उत्रने बताए।
नेपाली कांग्रेसका प्रमुख नेताहरु सहभागी कार्यक्रममा बोल्ने वक्ताहरुले समसामयिक समाज र राजनीतिक परिवर्तनमा प्रेस युनियनको भूमिका अझ प्रभावकारी हुनुपर्ने बताएका छन्।
नेपाली कांग्रेस निकट रहेका पत्रकारहरुले ०४८ साल जेठ १३ नेपाल प्रेस युनियन स्थापना गरेका थिए। कार्यक्रममा युनियनका संस्थापक रमेश तुफान, तारानाथ दाहाल, कन्हैयालाल केशरी, शिरीषबल्लभ प्रधानलाई सम्मान गरिएको थियो।
