संयुक्त लोकतान्त्रिक मधेशी मोर्चासहितको संघीय गठबन्धनले सरकारले औपचारिक पत्र पठाएको खण्डमा वार्तामा बस्ने संकेत गरेको छ ।
गठबन्धनमा आवद्ध दलका नेताको शुक्रबार बिहान संघीय समाजवादी फोरम नेपालको कार्यालयमा बसेको बैठकले वार्तामा बस्ने संकेत गरेको हो। बैठकले मोर्चाको नाममा लेखिएको पत्रकार आधारमा वार्तामा नजाने निर्णयसहित वार्ताका लागि गठबन्धनका नाममा पत्र आउनुपर्ने सर्त राखेको छ।
सरकारले गठबन्धनका नाममा पठाउने पत्रका आधारमा वार्ताका बारेमा ठोस निर्णय लिने बैठकमा सहभागी नेताहरुले बताएका छन् । गठबन्धनका प्रवक्ता परशुराम तामाङले वार्ताका लागि सरकारले अहिलेसम्म गठबन्धनलाई पत्राचार नगरेको र पत्राचार गरेको अवस्थामा गठबन्धनले यस बारेमा आवश्यक निर्णय लिने बताए।
गठबन्धनको बैठकले काठमाडौं केन्द्रीत आन्दोलनले पहाडे र मधेशी समुदायबीचको असमझदारी कम गरेको निष्कर्षसहित जेठ १७ गतेपछि आन्दोलनलाई देशव्यापीरुपमा विस्तार गर्ने निर्णय गरेको छ। बैठकले केन्द्र, प्रदेश र जिल्ला तहमा रिले अनसन र अन्य कार्यक्रम गर्ने तथा त्यसका लागि प्रदेश र जिल्लास्तरमा आन्दोलन परिचालन समिति गठन गर्ने निर्णय गरेको छ।
प्रवक्ता तामाङले जेठ १७ गते पोखरामा हुने सभा मार्फत दोस्रो चरणका आन्दोलनका कार्यक्रम सार्वजनिक गरिने बताए।
दोस्रो चरणका आन्दोलनका कार्यक्रम सडक अवरोध गर्ने खालका नहुने बरु विभिन्न राजनीतिक दल, उद्योगी व्यवसायी र विभिन्न पेशाकर्मीहरुसँग सम्वाद् गर्ने खालका हुने गठबन्धनका नेताहरुले बताएका छन्।