प्रमुख प्रतिपक्षी नेपाली कांग्रेसले आन्दोलनरत मधेशवादी तथा आदिवासी जनजाति सम्बद्ध दलहरुले उठाएका माग राजनीतिक प्रकृतिका भएको भन्दै वार्ताबाट समस्याको समाधान खोज्न सरकारलाई सुझाव दिएको छ।
प्रमुख प्रतिपक्षी नेपाली कांग्रेसले प्रधानमन्त्री केपी शर्मा ओलीले मंगलबार सिंहदरबारमा बोलाएको सर्वदलीय बैठकमा वार्ताबाट समस्याको समाधान खोज्नका लागि वस्तुनिष्ठ आधार तयार गर्न आग्रह समेत गरेको छ । काँग्रेसका नेताहरुले औपचारिक वार्ता गर्ने आधारका लागि आन्दोलनरत दलका नेताहरुसँग अनौपचारिक रुपमा वार्ता गर्न सरकारलाई सुझाव दिए । उनीहरुले मधेशवादी दल र आदिवासी जनजाति सम्बद्ध दलले उठाएका माग सम्बोधनका लागि वार्तावाहेक अर्को विकल्प नरहेको भन्दै परिणाममुखी वार्ताका लागि अनौपचारिक वार्तालाई तिब्रता दिइनुपर्ने बताए। वार्ताबाट समस्याको निकास खोज्नका लागि योगदान गर्न आफूहरु तयार रहेको समेत बताएको काँग्रेस नेता महेश आचार्यले जानकारी दिए।
बैठकमा कांग्रेसका नेताहरुले आन्दोलनकारीलाई बिच्क्याउने किसिमका सार्वजनिक अभिव्यक्ति नदिन प्रधानमन्त्री केपी शर्मा ओलीको ध्यानाकर्षण समेत गराए । उनीहरुले प्रधानमन्त्री र मन्त्रीहरुले मधेशवादी दलका मागका विषयमा जथाभावी अभिव्यक्ति दिएर परिस्थिति भड्काउन नहुने बताए ।
काँग्रेसले वार्तामार्फत समस्याको समाधान खोज्नुपर्ने भन्दै वार्ताको वातावरण बनाउन जोड दिएपछि प्रधानमन्त्री केपी शर्मा ओलीले आफू वार्ता विरोधी नरहेको बताए। उनले आन्दोलनकारी दलसँग वार्ताका लागि आफू सधैं तयार रहेको भन्दै सरकारलाई वार्ता विरोधीका रुपमा नबुझ्न आग्रह गरे। बैठकमा आन्दोलनकारीका मागका विषयमा वार्ताबाटै निष्कर्षमा पुग्ने समझदारी भएको कानूनमन्त्री अग्नीप्रसाद खरेल र नेकपा (माओवादी केन्द्र)का नेता रामबहादुर थापाले जानकारी दिए।
सर्वदलीय बैठकमा संयुक्त लोकतान्त्रिक मधेशी मोर्चामा आवद्ध दलका नेताहरु भने अनुपस्थित थिए । मोर्चाका नेताहरुले बैठक सुरू हुनु एक घण्टा पहिले आफूहरू आन्तरिक छलफलमा व्यस्त रहेको भन्दै बैठकमा उपस्थित हुन नसक्ने जानकारी गराएको कानूनमन्त्री खरेलले बताए।
