नेकपा (माओवादी केन्द्र) ले वहुपदमा जाने नीतिगत निर्णय गर्दै तत्कालका लागि ९ सदस्यीय हेडक्वाटर गठन गरेको छ ।
माओवादी केन्द्रको केन्द्रीय समितिको सोमबार सकिएको दुई दिने बैठकले अध्यक्ष पुष्पकमल दाहालको नेतृत्वमा अस्थायी प्रकृतिको ९ सदस्यीय हेडक्वाटर गठन गरेको हो ।
हेडक्वाटरमा नारायणकाजी श्रेष्ठ, कृष्णबहादुर महरा, रामबहादुर थापा, देव गुरुङ, मात्रिका यादव, मणि थापा, तिलक परियार र जयपुरी घर्ती रहेका छन्।
गाउँतहसम्मको एकता प्रक्रिया टुंगिएपछि समीक्षा गरेर वहुपद्मा जाने निर्णय गरी कार्यविभाजन गरिने नेतृ पम्फा भुषालले बताइन्। उनका अनुसार बैठकले ४९ देखि ५१ सदस्यीय सचिवालय अर्थात स्थायी समिति, १ सय ५१ सदस्यीय पोलिट्ब्युरो समिति र ६ सय ९९ सदस्यीय महाधिवेशन आयोजक समिति गठन गर्ने निर्णय गरेको छ।
नेतृ भुषालका अनुसार एकता प्रक्रियामा सहभागी पार्टी र समूहका स्थायी समिति सदस्य र पोलिट्ब्युरो सदस्यहरुले माओवादी केन्द्रमा स्वतः पुरानै पद् पाउने छन् । बैठकले गाउँतहसम्म एकता प्रक्रिया सम्पन्न गर्नका लागि जेठ २२ गतेदेखि असार ८ गतेसम्म प्रदेशस्तरीय भेला गर्ने निर्णय गरेको छ।
बैठकले जेठ २२ गते ३ नम्बर प्रदेशको भेला काठमाडौमा, २२ गते २ नम्बर प्रदेशको भेला बर्दिवासमा, २४ गते ४ नम्बर प्रदेशको भेला पोखरामा, २६ गते ५ नम्बर प्रदेशको भेला दाङमा, २८ गते ६ नम्बर प्रदेशको भेला सुर्खेतमा तथा असार ८ गते १ नम्बर प्रदेशको भेला इटहरीमा गर्ने निर्णय सहित भेला सम्पन्न गर्न संयोजन समिति समेत गठन गरेको छ।
बैठकले असारको पहिलो साता काठमाडौमा शक्ति प्रदर्शन गर्ने निर्णय पनि गरेको नेतृ भुषालले जानकारी दिइन्।
एमाओवादी, नेकपा क्रान्तिकारी माओवादी, नेकपा (माओवादी) लगायतका विभिन्न १० वटा पार्टी र समूहका नेताहरु एकता प्रक्रियामा सामेल भइ जेठ ६ गते नेकपा (माओवादी केन्द्र) गठन भएको थियो।