अपडेट: माओवादी र एमालेबीच दलदर्ताका लागि विबाद भएपछि निर्वाचन आयोगले क्रमसंख्या पछि निर्धारण गर्ने गरि दल दर्ताको कार्यक्रम सुरु गरेको छ । नेकपा एमाले र एकिकृत नेकपाले आफुहरु पहिला आएको भन्दै दल दर्ता पहिला गर्नपाउनुपर्ने विवाद झिकेपछि निर्वाचन आयोगको सचिवालयको बैठकले क्रमसंख्या पछि तोक्ने सूचना जारी गरेको हो ।
आयोगको निर्णयमा दलहरु पनि सहमत भएपछि दल दर्ता प्रक्रिया भर्खर सुरु भएको आयोगले जनाएको छ । मंगलबार दर्ताका लागि आएका सबै दललाई दर्ता गरिने आयोगले जनाएको छ । बिहान ६ बजे नै कार्यालय पुगेका नेताहरुबीच को पहिलो भन्ने विषयमा विवाद भएपछि दल दर्तामा ढिलाई भएको थियो ।
...
संविधान सभा निर्वाचनका लागि दल दर्ता खुलेकै दिन लाइनमा को 'पहिलो' भन्ने विषयमा एमाले र माओवादी बीच विबाद भएपछि आयोग परिषर तनाबग्रस्त भएको छ ।
दुबै पार्टी एमाले र माओवादीले कार्यालय समयभन्दा चार घन्टा पहिले नै आफूलाई सबै भन्दा पहिले आयोग परिषर पुगेको दाबी गरेका छन् । एमाले काठमाडौ अध्यक्ष रामेश्वर फुँयालले आफ्नो नेतृत्वमा पार्टी विहान ६ बजेनै १ नंम्बरमा लाइनमा बसेको बताएका छन् ।
यस्तै उनिभन्दा एक कदम अगाडि नै माओवादीका वर्षमान पुनले लाइनमा आफूहरु बसेको दाबी सेतोपाटीसँग गरेका छन् ।
निर्वाचन आयोग परिषरमा दुई पार्टीको को एक नम्बरमा भन्ने विबाद बढेपछि आयोग परिषर विहानै देखि तनाबग्रस्त भएको छ । दल दर्ताका लागि एमालेको लाइनमा रुपनारायण बसीरहेका छन् भने माओवादीले देबेन्द्र पौडेललाई खटाएको छ ।
अर्को ठुलो पार्टी नेपाली कांग्रेसले भने ' हामी उहाँहरु भन्दा पछि नै आएका हौ हामीलाई लाइनको झगडामा लाग्नु छैन' लाइनमा भएको झगडा हेरेर मुस्कुराइरहेका कांग्रेसका नेता मिलेन्द्र रिजालले सेतोपाटीसँग भने ।
कार्यालय समय सुरु भएपछि कसलाई पहिला दर्ता गर्ने अधिकार आयोगको हुन्छ । दर्ताको क्रमअनुसार चुनाव चिन्ह माथि पर्ने हुँदा दल यो झगडा भएको हो ।
तनाब बढेपछि कान्तिपथस्थित आयोग परिषरमा व्यापक मात्रामा सुरक्षाकर्मी तैनाथ गरिएको छ । घटनामा प्रहरीले नै हस्तक्षेप गर्नुपरेको छ । दुई दलका नेताहरु विवाद मिलाउने प्रयासमा छन् । दुई दलबीचको विवादकै कारण दल दर्ता प्रक्रियामा अगाडि केहि समय लागेको थियो ।
राप्रपा नेपालले उछिनेको कारण नेपाली कांग्रेस लाइनमा चौथो हुन पुगेको छ । कांग्रेसले मुख्य सचिव चिनकाजी श्रेष्ठलाई लाइनमा खटाएको छ । तेस्रोमा राप्रपाका बिक्रम थापा लाइनमा बसेका छन् । आयोगमा एमाले अध्यक्ष खनाल, एमाओवादी उपाध्यक्ष भट्टराई र कांग्रेस महामन्त्री कृष्ण सिटौला लगायतका नेताहरु पुगेका छन् ।
तस्विर :सेतोपाटी