सरकार परिवर्तनको खेलमा संलग्न भएको आरोप लगाउँदै केपी शर्मा ओली सरकारले भारतका लागि नेपाली राजदूत दीपकुमार उपाध्यायलाई फिर्ता बोलाउने निर्णय गरेको छ। परराष्ट्र मन्त्रालयले शुक्रबार उपाध्यायलाई फिर्ता बोलाउने निर्णय गरेको हो।
उच्च स्रोतका अनुसार परराष्ट्र मन्त्री कमल थापाले उपाध्यायको कामकारबाही सरकार अनुकूल नभएको भन्दै फिर्ता बोलाउने निर्णय गरेका हुन्। स्रोतका अनुसार राजदूत उपाध्यायलाई तीन आरोप लगाइएको छ।
काठमाडौंमा भएको बेला ओली सरकार परिवर्तनको खेलमा संलग्न भएको, परराष्ट्र मन्त्रालयलाई कुनै जानकारी नदिइकन आफूखुसी कामकारबाही गर्ने गरेको र परराष्ट्र मन्त्रालयलाई जानकारी नदिएर नेपालका लागि भारतीय रञ्जीत रेसँग सुदूरपश्चिमको कार्यक्रममा गएको आरोप उपाध्यायलाई लगाइएको छ।
राष्ट्रपति विद्यादेवी भण्डारीको आसन्न भारत भ्रमण अचानक स्थगीत गर्ने सरकारको निर्णय शुक्रबार बिहान थाहा पाएपछि भारतका लागि नेपाली राजदूत उपाध्यायले प्रधानमन्त्री केपी शर्मा ओलीसँग टेलिफोन वार्ता गरेका थिए।
उच्चस्रोतका अनुसार राष्ट्रपतिको भ्रमणको तयारीमा जुटिरहेका उपाध्यायले आफूसँग कुनै परामर्श नै नगरी एकाएक सरकारले भ्रमण रद्ध गरेकोमा प्रधानमन्त्री ओलीसँग आश्चर्य र असन्तुष्टि व्यक्त गरेका थिए।
कुराकानीका क्रममा उपाध्यायले सरकारले निर्णय लिनुपूर्व आफू र कूटनीतिक माध्यमबाट नेपालका लागि भारतीय राजदूतसँग समेत अग्रिम परामर्श र जानकारी दिएर निर्णय लिएको भए उपयुक्त हुने धारणा राखेका थिए।
उपाध्यायको कुराबाट आक्रोसित हुँदै प्रधानमन्त्री ओलीले उनलाई हपारेका थिए। प्रधानमन्त्री ओलीसँग उपाध्यायको अलिकति तीतो र चर्को संवाद भएको थियो। त्यसपछि प्रधानमन्त्री ओलीले उपाध्यायलाई सरकारसँग कुनै नीतिगत मतभेद भए राजदूतको जिम्मेवारी छाडेर स्वदेश फर्कन सुझाएका थिए।
प्रधानमन्त्री ओलीको यस्तो अभिव्यक्तिपश्चात कांग्रेसका पूर्वकेन्द्रीय सदस्य एवं मन्त्री समेत बनेका राजदूत उपाध्यायले कांग्रेस नेतृत्वसँग टेलिफोन सम्पर्क गरी सरकारको नेतृत्वको कार्यशैलीका कारण आफू राजदूत पदमा बसेर काम गरिराख्न नसक्ने अवस्थामा पुगेको भन्दै आफू फर्कने निधो गरेको जानकारी गराएका थिए। दोस्रो संविधानसभा निर्वाचनमा कपिलवस्तु क्षेत्र नम्बर १ बाट कांग्रेसको उम्मेदवार बनेका उपाध्याय पराजित भएका थिए। केन्द्रीय समिति सदस्यसमेत रहेका उपाध्यायलाई सुशील कोइराला नेतृत्वको सरकारले राजदूत नियुक्ति गरेको थियाे।
त्यसको केही घण्टा बित्न नपाउँदै सरकारको तर्फबाट उपाध्यायलाई तीन वटा आरोप लगाउँदै राजदूतबाट फिर्ता गर्ने निर्णय सार्वजनिक गरेको थियो।
